UA MONO vika vi li na ku lingika aha ni? Vose ava vapua vamala va ndzita va ku Isaleli. Ava va na kotama, va li na ku nua mema. Ou na mana ku mukulo uavo ua pua Ngazi lizina lieni Ngilione. Ali na ku tala vaze vali na ku nua mema.

Tala ava vamala va li na ku nua mema mu vifua via kuli seza-seza. Vamo va na tsikama ha mavuli na ku nua mpundu na kanua. Vakuavo va li na ku kupula mema na livoko linga va mone vika vi iza ku mikulo.  Eci ca seho, muomu Yehova ua lekele Ngilione linga a hangule lika vamala vaze va nua mema oku va mona vika vi hita ku mikulo. Kaha Njambi ua handeka ngueni, ava vakuavo vose va hiluke kuimbo. Tu tale vika va va hiluisilile.

VaIsaleli va na kovela naua mu visoti, muomu ka vononokele Yehova. Vakua Mindiane va na va hiana ku ngolo kaha va li na ku va pakesa. Ngeci vaIsaleli va na vundila vukuasi kuli Yehova, kaha Yehova na halakana ku miteto yavo.

Yehova na leka Ngilione linga a kungulule masualale, ngeci na kungulula vamala vakua Ndzita va ku pua 32.000. Vunoni vitozi va na va lanena, muomu va ku pua 135.000. Vutuhu ngoco, Yehova na leka Ngilione ngueni: ‘U li na masualale va vengi cikuma’. Vika Yehova na handekela ngoco?

Na handeka ngoco muomu nga vaIsaleli va ka vula ndzita va ka lifuimba. Halumo va ka singanieka nguavo vavene va na li luila kati Yehova na va kuasa. Ngeci Yehova na leka Ngilione ngueni: ‘Leka vamala vose vaze va li na vuoma va hiluke kuimbo’. Kaha omo Ngilione ua lingilemo, vamala va ku pua 22.000 va hilukile kuimbo. Ua lisupa lika na masualale 10.000 va ka lua na li civunga lia vitozi va ku pua 135.000.

Vunoni Yehova ngueni: ‘Kasi u li na masualale va vengi cikuma’. Ngeci na leka Ngilione linga a nehe masualale va ku nue mema mu ndonga eyi, kaha a hiluise kuimbo vaze vose va kotamena na cihanga cose mu mema. Kaha Yehova na mu kulahesa ngueni: ‘U ka vula ndzita na ava vamala 300 va na nu mema oku va vingila’.

Ntsimbu ya ndzita i na pu ho. Ngilione na tepe masualale veni 300 mu vivunga vitatu. Kaha na hana ku muntu ku muntu luneta, na njava mu kati muli mutetengo. Mu kati-kati ka vutsiki, masualale vose va zengelekele mikulo ya cilombo ca vitozi vavo. Kaha va sikile maluneta ha ntsimbu imo lika na ku tsiha vinjava na ku tambeka nguavo: ‘Mukuale ua Yehova na mukuale ua Ngilione!’ Kaha omo vitozi va tungumukile va vuile vuoma vua kama. Vose va putuka ku tina ngeci vaIsaleli va vulile ndzita.