UKUWONA bzomwe bzinkucitika apa? Wensenewa mba anyankhondo wa Jirayeri. Amuna adakotamawa, wankumwa madzi. Muyeruzi Gideyoni ni mwamuna ali pafupi nawowa. Iye ankuwona momwe iwo wambamwera madzi.

Onesesa bwino-bwino momwe wanthuwa wankumwa madzi mu njira zakusiyana-siyana. Winango wankuikhiratu nkhope zawo m’madzimo.  Tsono winango wankucita kutunga na manja, kuti wambakwanise kuwona bzomwe bzinkucitika uku na uku. Bzimwebzo mpsakufunika kwene-kwene, pakuti Yahova adauza Gideyoni kuti asankhule kokha amuna wakumbamwa madzi, wacilindira. Kwa winangowo, Mulungu adalewa kuti wayende ku mui. Mbatidziwe thangwe ranyi.

Wajirayeri wakhali pomwe m’mabvuto mazinji. Thangwe likhali lakusaya kubvera Yahova. Wanthu wa ku Midiyani wadakhala na mphanvu yakuwatonga na kumbawapweteka. Tenepo Wajirayeri wadalilira Yahova kuti awathandize, ndipo Yahova adawatetekera.

Yahova adauza Gideyoni kuti atenge anyankhondowo; tenepo Gidiyoni adakonkha anyankhondo 32.000. Tsono anyankhondo wakudzamenyana na Wajirayeriwo wakhalipo 135.000. Na tenepo, Yahova adati kuna Gideyoni: ‘Iwepo una wanthu wazinji kwene-kwene.’ Kodi thangwe ranyi Yahova adalewa tenepoyo?

Thangwe Wajirayeriwo, pakukunda nkhodoyo, iwo wangadayesa kuti wadakunda na mphanvu yawo. Iwo wangadakumbuka lini kuti wadakunda thangwe Yahova akhawathandiza. Tenepo, Yahova adati kuna Gideyoni: ‘Auze amuna wense wa mantha kuti wabwerere ku mui.’ Atacita bzimwebzo Gidiyoniyo, anyankhondo 22.000 wadabwerera ku mui. Adandosala na anyankhondo 10.000 wokha kuti wamenyana na wacikunda 135.000.

Tsono, bvaya! Yahova adati: ‘Ukana wanthu wazinji basi.’ Tenepo iye adauza Gideyoni kuti awamwese madzi pa gombepa, acibweza wense womwe wakhakhuisa nkhope m’madzimo. Yahova adapicira, aciti: ‘Ndin’dzakukundisa na wanthu 300 womwe wakhamwa wacilindira.’

Idafika nthawe ya nkhodoyo. Gideyoni adakonkha amuna 300 wale, m’mathimu matatu. Ali-wense adapasidwa cimbututu na miringa na mbvuniko mkati mwace. Pakati pa usiku, wense wadaima mwakuzungulira tsasa wa anyamadulanthaka wawo. Ndipo, kabodzi na kabodzi wense wadaliza bzimbututu bzawo na kuphwanya miringa yawo ire, wacikuwa kuti: ‘Mphanga ya Yahova na ya Gideyoni!’ Pomwe anyamadulanthaka wawowo wadamuka, wadacita dzungu ndipo wakhana mantha. Wense wadayamba kuthawa, ndipo Wajirayeri wadakunda nkhodoyo.