52 yachachiy

Gedeón 300 runayuq

¿QHAWARIY chay runakunata? Paykunaqa Israelmanta soldados kanku. Juez Gedeonqa sayarispa imaynatachus yakuta ukyasqankuta qhawachkan.

¿Imaymanamantá yakuta ukyachkanku? Wakinkunaqa qunquriykukuspa, wakinkunataq, muyuyninpi imachus kasqanta qhawaspa makinkuwan wisispa ukyachkanku. Chayqa may sumaq, imaraykuchus Jehovaqa Gedeonta yakuta ukyachispa soldadosta akllananta nirqa. Mana jinata ruwaqkunari wasinkuman kutipunanku karqa. Qhawarina imaraykuchus.

Israelitasqa mana Diosta kasukusqankurayku, watiqmanta phutisqa kachkarqanku. Madianitasqa may kallpayuqman tukuspa israelitasta ñakʼarichichkarqanku. Chayrayku israelitasqa Jehová yanapananta mañakurqanku, Jehovataq uyarirqa.

Jehová Gedeonta soldadosta maskʼakunanta nirqa. Chayrayku Gedeonqa 32.000 qharista tantarqa. Israelwan maqanakuqkunari, 135.000 soldados karqanku. Chaywanpis Jehovaqa Gedeonta nirqa: ‘Ancha achkha runas kapusunki’, nispa. ¿Imaraykutaq chayta nirqari?

Israelitas mana paykunalla atipasqankuta yuyanankupaq, manaqa Jehovap yanapayninwan atipasqankuta ninankupaq. Chayrayku Jehová Gedeonta nirqa: ‘Manchachikuqkuna wasinkuman ripunankuta niy’. Gedeón chayta niptin, 22.000 ripunku. Jinamanta 135.000 soldadoswan maqanakunankupaq 10.000 qharikunallaña qhipakunku.

Jehová: ‘Achkharaqpuni kankichik’, nirqa. Chaymanta Gedeonman nirqa soldados yakuta ukyanankuta, ukyanapaq qunqurikuqkunatataq wasinkuman kachapunanta. Chaymanta Jehová nirqa: ‘Kay 300 makiwan ukyaqkunallawan kay runasta atipankichik’, nispa.

Maqanakunapaq tiempo chayamuptin, Gedeonqa 300 soldadosninta kimsaman tʼaqarqa. Sapa jukman juk putututa, juk wichʼita, juk antorchatawan qurqa. Khuskan tutaña kachkaptin, enemigosninpa campamento muyuyninpi tantakunku. Chanta jukllapi pututusta waqachirqanku, wichʼisninta tʼunarqanku, qhaparinkutaq: ‘¡Jehovapta Gedeonpata kay maqanakuyqa!’, nispa. Enemigo soldadosqa rikchʼarispa mana imatapis ruwayta atirqankuchu, mancharikuspataq tukuy ayqirqanku, jinamanta israelitasqa atiparqanku.

Jueces, 6 tʼaqamanta 8 tʼaqakama.