ISTÓRIA 52
Gideão no ninia ema naʼin-300
BELE haree saida mak akontese iha neʼe? Ema sira-neʼe soldadu husi Izraél. Ema balu hakruʼuk atu hemu bee. Juis Gideão mak ema neʼebé hamriik besik sira. Nia haree daudauk oinsá sira hemu.
Haree didiʼak oinsá sira hemu iha dalan neʼebé la hanesan. Ema balu tau sira-nia oin iha bee leten. Maibé, ema ida foti bee ho ninia liman atu nia bele haree saida mak akontese iha ninia sorin-sorin. Ida-neʼe importante, tanba Jeová hatete ba Gideão atu hili deʼit ema neʼebé matan-moris bainhira sira hemu bee. Maromak hatete katak ema seluk tenke fila fali ba uma. Mai ita haree tansá.
Dala ida tan ema Izraél hetan susar barak, tanba sira la halo tuir Jeová. Ema Midian domina no haterus sira. Nuneʼe, ema Izraél bolu ba Jeová atu husu tulun, no Jeová rona sira.
Jeová haruka Gideão atu halibur tropa sira, tan neʼe Gideão halibur hamutuk soldadu naʼin-32.000. Maibé, Izraél tenke hasoru tropa naʼin-135.000. Maski nuneʼe, Jeová hatete ba Gideão: ‘Ó iha ema barak liu.’ Tanbasá mak Jeová hatete hanesan neʼe?
Tanba se Izraél manán funu neʼe, karik sira sei hanoin katak sira rasik mak manán. Karik sira hanoin katak la presiza ajuda husi Jeová atu manán. Tan neʼe, Jeová hatete ba Gideão: ‘Haruka ema sira neʼebé taʼuk atu fila fali ba uma.’ Kuandu Gideão halo nuneʼe, soldadu naʼin-22.000 fila fali ba uma. Hela deʼit mane naʼin-10.000 atu funu hasoru soldadu inimigu barak, naʼin-135.000.
Maibé, rona! Jeová hatete: ‘Ó sei iha ema barak liu.’ Tan neʼe, nia hatete ba Gideão atu haruka soldadu hotu hemu bee husi mota-oan neʼe, no haruka soldadu neʼebé tau sira-nia oin iha bee leten atu bá fali uma. Jeová promete: ‘Haʼu sei halo ema naʼin-300, neʼebé matan-moris bainhira hemu bee, atu manán.’
Tempu toʼo atu funu. Gideão fahe ninia ema naʼin-300 ba grupu tolu. Nia fó ema ida-ida dikur atu huu, no haruka atu subar ahi-oan iha buli laran. Kuandu kalan boot, sira hotu haleʼu soldadu inimigu sira. Depois, iha tempu neʼebé hanesan, sira hotu huu sira-nia dikur, harahun buli, no hakilar: ‘Jeová nia surik no Gideão nian!’ Bainhira soldadu inimigu hadeer, sira bilán no taʼuk. Sira halai, no ema Izraél manán funu neʼe.
