¿AKXILHPAT tuku lama? Umakgolh xsoldados li Israel. Wantiku akxilhpat tapunkskgoy wamakgolh chuchut. Wa xlakkaxtlawana takglhuwit Gedeón anta laya lakatsu niku layakgolh. Gedeón akxilhma la wamakgolh chuchut.

Kaliwana akxilhti lakchixkuwin la tanu tanu tlawakgoy akxni wakgoy chuchut. Makgapitsi katakgalhjukgoy kchuchut. Chu chatum lilin xmakan chuchut kxkilhni chuna tlan akxilha tuku lama lakatsu. Uma lu xlakaskinka, xlakata Jehová waninit Gedeón kajwatiya nalaksaka tiku kuenta tlawamakgolh akxni kgotnamakgolh. Chu amakgapitsi xlitaspitatkan xchikkan. Kaʼakxilhwi tuku xlakata.

Li Israel lhuwa taʼakglhuwit kgalhiparakgoy xlakata ni kgalhakgaxmatkgoy Jehová. Li Madián tlakg tliwakga tawilakgonit nixawa li Israel chu katlawani nitlan. Wa xlakata li Israel skinikgoy tamakgtay Jehová, chu Jehová kakgalhakgaxmatni tuku xtasaskinimakgolh.

Jehová waniy Gedeón kamaʼakgstokgli soldados wa xlakata Gedeón kamaʼakgstokga 32,000 tiku naʼankgoy tlawakgoy guerra. Pero tiku natatlawakgoy guerra li Israel 135,000 soldados. Pero Jehová waniy Gedeón: Lu lhuwaku soldados kgalhiya. ¿Tuku xlakata Jehová chuna wan?

Wa xlakata komo li Israel xtlajakgolh guerra max xlakpuwankgolh pi xsakstukan tlajanankgolh chu ni maklakaskinkgoy xtamakgtay Jehová. Wa xlakata Jehová waniy Gedeón: Kawanikgo pi putum wantiku pekuankgoy kaʼankgolh kxchikkan. Akxni Gedeón chuna kawani, 22,000 soldados ankgoy. Chu kaj tamakgxtakgkgoy kaj 10,000 mil soldados tiku naʼankgoy kguerra chu nakatalachipay 135,000 soldados.

Pero, wa uma tuku Jehová wan: Lu lhuwaku soldados kgalhiya. Wa xlakata Jehová waniy Gedeón pi kakalilh lakchixkuwin nakgotnankgoy ktaxtuna chu kakamalakgachalh kxchikkan tiku takgalhjukgolh kchuchut akxni kgotnankgolh. Naklimatlajiyan guerra kaj 300 lakchixkuwin wa nema skgalh lakawankgoy akxni xkgotnamakgolh, chuna mastalh xtachuwin Jehová.

Chalh kilhtamaku akxni natlawakgoy guerra. Gedeón kamapitsilh pulaktutu tama 300 lakchixkuwin. Chatunu kamaxkilh kgantum akgalokgot, chu patum xalu chu anta xtiju xmakgskgotkan. Akxni atsinu nialh xchan itat tsisni, xputumkan stiliwilikgolh anta niku wilakgolh xtalamakgasitsin. Chu akxni tama kilhtamaku, lakxtum maskgolekgoy xʼakgalokgotkan chu lakgpakglhkgolh xalu, chu wankgolh pixlanka: ¡Xespada Jehová chu Gedeón! Akxni soldados nema xtalamakgasitsin lakgawankgolh, ni katsikgoy tuku natlawakgoy pekuankgolh. Putum tsalakgolh, chu li Israel tlajanankgoy.