WA ZI wona lezi zi mahekako laha? Wontlhe lawa masochwa ya ka Israeli. A vavanuna lava va koramako vonwa mati. A wanuna loyi a yimileko kusuhani na vona hi mulamuli Gideoni. Yena o cuwukisela a ku va nwisa kuyini mati.

Cuwuka khwatsi a manwela yo hambanahambana lawa ma tirisiwako hi vavanuna lava. Vanwani vo korama kala va khumba mati hi tinghohe tabye. Kanilezi munwe okha mati hi mandla yakwe, kasi a zi kota ku cuwukisela lezi zi mahekako lomu matlhelweni. Lezo za lisima, hakuva Jehova i lo byela Gideoni lezaku a hlawula ntsena vavanuna lava va nwako na va simama ku cuwukisela. Lava vanwani, Nungungulu i te ngalo, va fanele ku tlhelisiwa kaya. A hi woneni a ku hikuyini.

A vaIsraeli va lomu kuxanisekeni ka hombe kambe. A xigelo hi lezaku a va ingisangi Jehova. A vanhu va le Midiani va zile va maha va ntamu a ku hunza vona zonake va va xanisa. Hikwalaho a vaIsraeli va rilela Jehova akuva va vuniwa, na Jehova wa ingisa tihuwa tabye.

Jehova i byela Gideoni lezaku a hlengeleta a butho, hizalezo Gideoni i tsombanyisa a 32.000 wa masochwa. Kanilezi ku na ni butho ga 135.000 wa vavanuna legi gi lwako na Israeli. Hambulezo Jehova i byela Gideoni ku ngalo: ‘U na ni vavanuna vo tala nguvu.’ Hikuyini Jehova a wulile lezo ke?

Hi lezaku loku Israeli i wa hlula yimpi, vona va wa ta alakanyela lezaku va lo hlula hi ntamu wabye wutsumbu. Vona kambe va wa ta alakanyela lezaku va wa nga hi na xilaveko xa ku vuniwa ku hlula hi Jehova. Hizalezo Jehova i ngalo ka Gideoni: ‘Byela vavanuna vontlhe lava va chavako lezaku va tlhela kaya.’ Laha Gideoni a mahako lezo, 22.000 wa masochwa yakwe ma tlhela kaya. Lezo zi mu maha a sala ni 10.000 wa masochwa ntsena a ku yalwa ni wontlhe masochwa lawo ya 135.000.

Kanilezi, ingisa! Jehova i ngalo: ‘Wa ha sele ni vavanuna vo tala nguvu.’ Zonake i byela Gideoni a ku nwisa mati a vavanuna lavo lomu ka xicongwana lexi a tlhela a tlhelisa kaya vontlhe lava va nwako na va koramile a kuza va khumba mati hi tinghohe tabye. Jehova i tsumbisa lezi: ‘Nzi ta ku nyika kuhlula hi vavanuna lava va 300 va nwileko na va simama ku cuwukisela.’

Ku chikela xikhati xa kulwa. Gideoni i veka vavanuna vakwe va 300 hi mitlawa minharu. A nyika wanuna munwe ni munwani a mpunzu, ni mbita yi nga ni nwenge lomu nzeni ka yona. Laha xikari ka wusiku, vona vontlhe va tsombana laha wugovelweni ga masochwa ya valala va gi ranzela. Makunu, vona vontlhe hi khati ginwe, vaba mipunzu yabye va tlhela va faya timbita tabye, vaba huwa vaku: ‘Supado ya Jehova ni ya Gideoni!’ Laha a masochwa ya valala ma vukako, ma kanganyiseka ma tlhela ma chava. Wona wontlhe ma sangula ku tsutsuma, ni vaIsraeli va hlula a kulwa.