ANA AKUYIWONA yayikutendekwa apanoyi? Wosopeŵa ali acalume ŵakuputa ngondo ŵa Ayisalayeli. Acalume ŵatindiŵelewo akumwa mesi. Jwajimi ciŵandika jemanjajo ali Jwakwelusya Gidiyoni. Jwalakwe akulolecesya kamwe ka mesi ka jemanjaji.

Alolecesye cenene mwakumwela mesi ŵanduwo. Acalume ŵane akotimisye mitwe mpaka mmesi pemo. Nambo jwinejo akuteka mesi ni magasa gakwe nikumwaga, kuti akomboleceje kulola cenene yayikutendekwa ciŵandika jwalakwe. Yeleyi yili yakusosekwa, ligongo Yehofa ŵamsalile Gidiyoni kuti asagule acalumepe ŵakumwa mesi kwineku ali mkulola yayikutendekwa. Yehofa ŵamsalilesoni kuti ŵangakumwa mesi kamwe kakwe keleka, awujile kumangwawo. Kwende tulole ligongo lyakwe.

Ayisalayeli asimenesoni ni yipwetesi yejinji. Asimene ni yeleyi ligongo lyakuti nganampikanila Yehofa. Ŵandu ŵa ku Midiyani akwalamulila, soni akwalagasya. Sambano Ayisalayeli akumlilila Yehofa kuti ŵakamucisye, ni Yehofa akupikana kulila kwawo.

Yehofa akumsalila Gidiyoni kuti asonganganye asilikali, m’yoyo akusonganganya acalume ŵakuputa ngondo ŵakwana 32,000. Nambo pana asilikali ŵakwana 135,000 ŵakulimbana ni Ayisalayeli. Sambano Yehofa akumsalila Gidiyoni kuti: ‘Mkwete acalume ŵajinji mnope.’ Ana ligongo cici Yehofa akusala yeleyi?

Ligongo lyakuti naga Ayisalayeli akupunda ngondojo, caganisyeje kuti apundile ligongo lya macili gawo. Soni mpaka akaganisyaga kuti nganasosekwa cikamucisyo ca Yehofa kuti apunde. Sambano Yehofa akumsalila Gidiyoni kuti: ‘Mwasalile acalume wosope ŵakogopa kuti awujile kumangwawo.’ Gidiyoni pakwasalila yeleyi, acalume ŵakuputa ngondo ŵakwana 22,000 akuwujila kumangwawo. Yayikutendekasya kuti agambe kusigala ni acalumepe 10,000 ŵakuti akalimbane ni asilikali ŵakwana 135,000.

Nambo, apikane! Yehofa akuŵeceta kuti: ‘Acalumewo atupile mnope.’ Jwalakwe akumsalila Gidiyoni kuti acalumewo amwe mesi m’lusulolu, kaneko mundu jwalijose jutatindiŵale nikukotimicisya mtwe wakwe m’lusulomo pakumwa mesigo, awujile kumangwakwe. Yehofa akumsimicisya kuti: ‘Cinjimkamucisya kupunda ngondojo ni acalume 300 ŵaŵalolaga paŵamwaga mesiwo.’

Sambano jakwanile ndaŵi jakuputa ngondo. Gidiyoni akwagaŵa acalume ŵala m’makuga gatatu. Akumpa jwalijose lipenga, soni ciŵiga caŵaŵisile cakumulicila mkati mwakwe. Pajikukwana sikati ja cilo, acalumewo akusongangana mwakusungulila matenti ga asilikali ga acimmagongo ŵawo. Kaneko, pandaŵi jijojo, akwimba malipenga gawo, soni akukasa yiŵiga yawo yila, ni akugumila kuti: ‘Upanga wa Yehofa ni wa Gidiyoni!’ Pakwimuka acimmagongo ŵala, akusokonecela, soni wakamwile woga. Wosope akutanda kutila, ni Ayisalayeli akupunda ngondojo.