¿RABILO xí cayac ló dibuj reʼ la? Buñ ni noʼ reʼ soldad xtuny Israel ni riée guerr layibu né cayachcaʼda cayeʼyibu nís. Juez ni laa Gedeón sagaʼ gahxca layibu. Gedeón cabí ximod cayeʼ soldad nís.

Bibiʼ tzaay diti toibsi mod cayeʼ guirá buñguieeu reʼ nís. Tipnésyibu par gueʼ nís raquiʼich lóo. Per toibbu ragaipj nís né ña par gueʼ, né scú labúu guibí xí cayac ro dxeeyibu. Nigolú rasac gonyibu modreʼ portín Jehová góoch a Gedeón que nosi cuubu soldad ni rabí xí cayac ro dxeeyibu órni cayeʼyibu nís. Stipnés ni diti rony modreʼ non guibiguet riolidx. Guibino xigony.

Israelitas noyibu ló galnagan stoib portín diti ma bisobyibu Jehová. Madianitas ma gocyibu más nadip né ronyibu mal a Israel. Por ngú israelitas ranab lóo Jehová par gacné layibu, né Jehová racadiag ni ranabyibu.

Jehová raiby a Gedeón que guiyopybu soldad, por ngú Gedeón ratop 32,000 buñ ni riée guerr. Per soldad ni guicaló layibu nac 135,000 buñguieeu. Por ngú, Jehová raiby a Gedeón: Naplo xidalguixo soldad. ¿Xigony raiby Jehová láabu scá?

Jehová goní scú portín pal israelitas gony gann ló guerr, labúu ñonyibu pensary que diti noʼ chú gocné layibu, né que diti raquiin que Jehová gacné layibu par gonyibu gann. Por ngú Jehová raiby a Gedeón: Góoch a guirá ni radzuiby guibiguet lidx. Órni Gedeón rony ni raniʼ Jehová, 22,000 soldad rabiguet. Ndeʼ rony que nosi 10,000 soldad rian par tze guicaló 135,000 soldad.

Per bibiʼ gannlo xí ná Jehová: Xidal soldad noʼ né looy. Por ngú ronybu que Gedeón gony que soldad ni noʼ né láabu gueʼ nís guʼuc ro dxeeyibu né radxiguetbu riolidx guirá ni riachcaʼda par gueʼ nís. Jehová raduidy xtiitz a Gedeón: Looy sonylo gann né 300 soldad ni goʼ nís né ni bibiʼ xí ni cayac ro dxeeyibu.

Radxiin dzú ni ma tzeyibu ló guerr. Gedeón ratzóo tzón midid 300 soldad ni napbu. Cada toib soldad raduidybu toib dxitguic nimal né láaca toib palory né lainy palory ragobu tiplaʼ yac ni cayalguii. Órni máyaaca guidxin galaʼ gueʼel, guiráyibu ragooyibu lagary ro dxee xi enemigyibu. Ór cú toibsi ór, racudxyibu dxitguic nimal né ralaʼyibu palory ni napyibu, né racaʼyibu rudx: ¡Espad xtuny Jehová né xtuny Gedeón! Órni soldad ni nac xi enemigyibu rareʼ bacaʼal lóo, diti radzel xi gonyibu né radzuibyibu. Guiráyibu raretzlasyibu né israelitas rony gann.