BUSHE walilayapo umuntu fimo e lyo cakwafya ukucita ifyo walaile? Ici calicitike ku mwaume uo ulemona pa cikope. E calengele ukuti abe no bulanda. Uyu umwaume ni Yefta, uwali umupingushi uwashipa mu Israele.

Yefta aliko pa nshita abena Israele balekele ukupepa Yehova, no kutendeka ukucita ifyabipa na kabili. E ico Yehova alekele abena Amone ukutampa ukubacusha. Ici calengele abena Israele ukulilila kuli Yehova ati: ‘Natubembuka. Twapaapaaata tupususheni!’

Abantu balyumfwile ububi pa fyabipa ifyo bacitile. Pa kulanga ukuti balilapile, batendeke ukupepa Yehova na kabili. E ico Yehova alibafwile na kabili.

Abantu basalile Yefta ukuti eo akayelwisha abena Amone. Yefta alefwaya sana ukuti Yehova akamwafwe ilyo akaya mu kulwa. E ico alaile Yehova ati: ‘Nga mwangafwa ukucimfya abena Amone, nkamupeela umuntu uukabalilapo ukwisa mu kunsengela mu ba mu ng’anda yandi nga nabwela ku bulwi.’

Yehova alyumfwile ifyo Yefta amulaile, kabili alimwafwile no kucimfya. Bushe nawishiba uwabalilepo ukufuma mu nga’nda no kusengela Yefta ilyo abwelele? Mwana wakwe umukashana. E mwana fye akwete. Yefta apundile ati: ‘Iye we mwana wandi! Walenga naba no bulanda ubukulu. Lelo nalilaya Yehova, kabili te kuti nkaane ukucita ico nalaya.’

Ilyo umwana wa kwa Yefta aishibe ico wishi alaile Yehova, pa kubala na o alyumfwile ububi. Pantu ali no kusha bawishi ne fibusa no kulaikala pe tempele lya kwa Yehova mu Shilo ubumi bwakwe bonse. Lelo aebele wishi ati: ‘Nga mwalilaya kuli Yehova, mufwile ukucita ico mwalaile.’

E ico umwana wa kwa Yefta aile ku Shilo, kabili alebombela Yehova pe tempele inshita yonse iya bumi bwakwe. Abanakashi abena Israele baleyako inshiku 4 mu mwaka mu kumutandalila kabili bonse balesansamuka nga bamonana. Abantu balitemenwe sana umwana wa kwa Yefta pantu ali mubomfi umusuma uwa kwa Yehova.