Stori 53: Promes Blong Jeftaha
?YU YU bin mekem wan promes samtaem, nao biaen yu faenem i had blong holem promes ya? Man ya we yu luk long pija ya, hem i bin mekem wan promes olsem. Taswe, hem i harem nogud. Man ya, hem i wan strong man we i no save fraet, wan jaj blong Isrel, nem blong hem Jeftaha.
Jeftaha i stap laef long taem we ol man Isrel oli lego Jeova, oli no moa mekem wosip long hem. Oli gobak bakegen long ol nogud fasin. Taswe, Jeova i letem ol man Amon oli mekem i strong tumas long olgeta. Nao ol man Isrel oli krae i go long Jeova se: ‘Mifala i mekem ol samting we i nogud long fes blong yu. !Be plis, mifala i wantem se yu mas sevem mifala tede!’
Ol man Isrel oli sore from ol nogud samting we oli bin mekem. Oli soem se oli sore taem oli stat mekem wosip long Jeova bakegen. Ale, bakegen, Jeova i givhan long olgeta.
Ol man Isrel oli jusum Jeftaha blong lidim olgeta blong mekem faet long ol rabis man Amon. Jeftaha i wantem tumas we Jeova i givhan long hem long faet ya. Taswe, hem i mekem wan promes long Jeova i se: ‘Mi mi promes se sipos yu mekem we mi mi winim ol man Amon, nao mi kambak long haos blong mi, fas man we bambae i kamaot blong mitim mi, man ya bambae mi givim hem long yu.’
Jeova i harem promes ya blong Jeftaha, nao hem i mekem we hem i win long faet ya. ?Taem Jeftaha i kamhom, yu save hu ya fas man blong kamaot blong mitim hem? Gel blong hem, wan pikinini nomo we hem i gat. Jeftaha i krae i se: ‘!O, pikinini blong mi, yu mekem mi mi harem nogud tumas! Mi mi mekem wan strong promes finis long Jeova, mo bambae mi no save brekem promes ya bakegen.’
Taem gel blong Jeftaha i harem ol tok blong promes ya, hem tu i harem nogud, from we hem i mas lego papa blong hem mo ol fren blong hem. Be hem i glad se bambae hem i go stap long Silo, blong mekem wok long haos tapolen blong Jeova gogo kasem we hem i ded. Taswe, hem i talem long papa blong hem se: ‘Papa, sipos yu yu mekem promes finis long Jeova olsem, bambae yu mas holem promes ya.’
Ale, gel blong Jeftaha i aot i go long Silo, i stap mekem wok blong Jeova long haos tapolen blong hem, gogo kasem we hem i ded. Evri yia, ol woman Isrel oli go stap fo dei wetem hem, mo olgeta oli pasem wan gudfala taem tugeta. Olgeta man oli lavem gel blong Jeftaha from we hem i strong blong mekem wok blong Jeova.
Jajes 10:6-18; 11:1-40.
Ol Kwestin
- ?Hu ya Jeftaha? ?Hem i stap laef long wanem taem?
- ?Wanem promes we Jeftaha i mekem long Jeova?
- ?Afta we Jeftaha i winim faet ya agensem ol man Amon mo i kamhom, from wanem hem i harem nogud tumas?
- ?Taem gel blong Jeftaha i harem promes we papa blong hem i mekem, hem i talem wanem?
- ?From wanem olgeta man oli lavem gel blong Jeftaha?
Sam narafala kwestin
- Ridim Jajes 10:16-18.
?Wanem woning we yumi kasem long stori ya blong ol man Isrel we oli no stap tru long Jeova? (Jaj. 10:6, 15, 16; Rom 15:4; Rev. 2:10)
- Ridim Jajes 11:1-11, 29-40.
?Olsem wanem yumi save se taem Jeftaha i ‘bonem gel blong hem long olta’ hemia i no min se hem i kilim gel ya olsem wan sakrefaes mo i bonem hem long faea? (Jaj. 11:31; Lev. 16:24; Dut. 18:10, 12)
?Long wanem fasin, Jeftaha i givim gel blong hem olsem wan sakrefaes?
?Stori ya blong Jeftaha we i holem promes blong hem long Jeova, i lanem yumi long wanem samting? (Jaj. 11:35, 39, NW; Pri. 5:4, 5; Mat. 16:24)
?Olsem wanem gel blong Jeftaha i givim wan gudfala eksampol we i save pulum ol yangfala Kristin tede blong mekem wok blong God fultaem? (Jaj. 11:36; Mat. 6:33; Fil. 3:8)
