NTE akanam afo amanam un̄wọn̄ọ ndien ọsọn̄ fi ndinịm enye ke akpatre? Owo oro odude ke ndise emi ama anam, ndien oro esịn enye otịm ọfụhọ. Owo oro edi owo uko ebiereikpe Israel ẹkotde Jephʹthah.

Jephʹthah odu ke ini nditọ Israel mikponoke Jehovah aba. Mmọ ẹfiak ẹnam idiọk. Ntre Jehovah ayak mbon Amʹmon ẹtụk mmọ. Emi anam nditọ Israel ẹseme ẹnọ Jehovah: ‘Nnyịn imedue fi. Mbọk, nyan̄a nnyịn!’

Mme owo ẹseme ẹban̄a mme idiọkn̄kpọ emi mmọ ẹnamde. Mmọ ẹwụt ete imeseme ke ndifiak n̄kpono Jehovah. Ntre Je­hovah afiak an̄wam mmọ.

Mme owo ẹmek Jephʹthah ndin̄wana ye idiọk mbon Amʹmon. Jephʹthah otịm oyom Jehovah an̄wam enye ke ẹn̄wan oro. Ntre enye ọn̄wọn̄ọ ọnọ Jehovah: ‘Ke afo anamde mi n̄kan mbon Amʹmon, nnyenọ fi akpa owo oro ọwọrọde ke ufọk mi edisobo mi ke nnyọn̄de ye edikan.’

Jehovah akpan̄ utọn̄ ke un̄wọn̄ọ Jephʹthah, ndien an̄wam enye akan ke ekọn̄. Ke Jephʹthah ọnyọn̄de, nte ọmọfiọk owo emi edide akpa ndisobo ye enye? Edi adiaha esie emi edide n̄kukụre eyen esie. ‘Oh, eyen mi!’ Jephʹthah ofiori. ‘Nso mfụhọ ke afo ada ọsọk mi ntem. Edi mma nnam un̄wọn̄ọ nnọ Jehovah, n̄kemeke ndikpụhọde.’

Ke adiaha Jephʹthah ọfiọkde aban̄a un̄wọn̄ọ esie, ke akpa, enye ọfụhọ n̄ko. Koro ọwọrọ ete enye eyenyene ndikpọn̄ ete esie ye mme ufan. Edi enye eyebiat nsụhọ uwem esie ndinam n̄kpọ Jehovah ke ataya esie ke Shiʹloh. Ntre enye ọdọhọ ete esie: ‘Edieke afo akanamde un̄wọn̄ọ ọnọ Jehovah, ana afo onịm enye.’

Ntre, adiaha Jephʹthah aka Shiʹloh, ndien enye abiat nsụhọ uwem esie anam n̄kpọ Jehovah ke ataya esie. Usen inan̄ kpukpru isua, iban Israel ẹkese enye do, ndien mmọ ẹnyene edinem ini ọtọkiet. Mme owo ẹma adiaha Jephʹthah koro enye edide ata eti asan̄autom Jehovah.