Omakwizikiro waJefta
EHUNGI 53
Omakwizikiro waJefta
OVE wa rora okutjita omakwizikiro nu kombunda o munu kutja ouzeu okuyeṱiza? Omurumendu ngu u ri motjiperendero hi, wa tjitire nao, nu mena ranao eye opu ma zu okuhihamwa omutima. Omurumendu ingwi eye omupangure ombanḓe waIsrael, wena Jefta.
Jefta aa hupu moruveze Ovaisrael ndu ve hina aave rikotamene ku Jehova rukwao. Owo rukwao aave tjiti oviṋa ovivi. Okutja Jehova wa yandjera kutja Ovaamoni ve ve tatumise. Ihi tja tjita kutja Ovaisrael ve urakane ku Jehova: ‘Eṱe twa tura ondjo komurungu woye. Arikana, tu yama!’
Ovandu ve rivera mena roviṋa ovivi mbi va tjita. Owo va raisa omihihamwatima vyawo mokurikotamena ku Jehova rukwao. Nu mena ranao Jehova we ve vatera rukwao.
Jefta wa toororwa i ovandu okukarwa kuna Ovaamoni ovavi mba. Jefta aa vanga tjinene kutja Jehova me mu vatere motjirwa hi. Okutja wa kwizikira Jehova kutja: ‘Ove tji we ndji pe outoṋi kombanda yOvaamoni, tji mba kotoka okuza kovita, ami me yandja omundu ngu ma piti omutenga momuvero wondjuwo yandje okundjitjakanena kove.’
Jehova wa puratena komakwizikiro waJefta, ne mu vatere okumuna outoṋi. Indu Jefta tja kotoka konganda, ove mo tjiwa kutja ouṋe ngwa ri omutenga okupita okuyekuhakaena naye? Eye wa tjakanenwa i omusuko we, ngwa ri omuatje we erike ṱii. Jefta wa rira nai: ‘Arikana, musuko wandje! Okutjavi tji we ndji pe oruhoze ndu ṱa mba. Ami mba tjita omakwizikiro ku Jehova, nu hi nokuyenena okuyeyarura ombunda.’
Omusuko waJefta tja zuva ohunga nomakwizikiro waihe, rutenga eye wina wa ri noruhoze. Mena rokutja aape heye kutja eye ma sokuisa ihe nomapanga we na kakarera Jehova oure womuinyo we auhe pondanda ye yomaturiro mu Silo. Kunai eye wa raera ihe a tja: ‘Ove tji wa tjita omakwizikiro ku Jehova, tjita otja pu wa heya.’
Okutja omusuko waJefta wa ya ku Silo, nu eye wa kakarera Jehova mondanda ye yomaturiro oure womuinyo we. Omayuva yane mombura aihe ovakazendu vaIsrael aave kemuryangera ngo, nu aave kara noruveze rwondjoroka pamwe. Ovandu va suverere omusuko waJefta mena rokutja eye wa ri omukarere omuwa waJehova.
