Ngewa ya 53: Wĩvĩto wa Yevitha
WE WAAĨVĨTA kwĩka ũndũ na ĩtina ũkona ndũtonya kũwĩanĩsya? Mũndũ ũũ wĩ vaa visanĩ eekie ũu, na nĩkyo kĩtumi wĩ na kyeva mũno. Ũ mũndũ nĩ mũsili ngũmbaũ wa Isilaeli weetawa Yevitha.
Ĩvinda ya Yevitha Aisilaeli nĩmaekete kũmũthaitha Yeova. Maendee na kwĩka maũndũ mathũku ĩngĩ. Kwoou Yeova aeka andũ ma Amimoni mamathĩny’e. Na ũu watuma Aisilaeli mamwĩkaĩla Yeova mayasya: ‘Nĩtũkũvĩtanĩsye. Nĩtũũkũvoya, ũtũtangĩĩe!’
Andũ nĩmeelilile nũndũ wa maũndũ mathũku ala meekĩte. Moonanisye kana nĩmelilĩte kwa kũmũthaitha Yeova ĩngĩ. Kwoou Yeova amatethya ĩngĩ.
Yevitha anyuvitwe nĩ andũ nĩ kana okite na andũ athũku ma Amimoni. We nĩwendaa mũno Yeova amũtetheesye kaũnĩ. Kwoou amwĩvĩtĩa Yeova: ‘Ethĩwa ũkandonyethya kũsinda Aamimoni, mũndũ ũla wĩumaala mbee kuma nyũmbanĩ yakwa anthaũe yĩla nĩsyoka kuma ũsindinĩ wakwa, ngakũnenga we.’
Yeova nĩweetĩkĩlile wĩvĩto wa Yevitha, na amũtetheesya kũsinda. Yĩla Yevitha wasyokie mũsyĩ, we nĩwĩsĩ nũũ wa mbee kuma oke kũmũthaũa? Nĩ mwĩĩtu wake, na nowe e weka. Yevitha ndaĩ na kana kangĩ. Nake akaya, ‘Ĩiaa, mwĩĩtu wakwa! Wambĩkĩa kyeva ta kĩ! Ĩndĩ nĩnĩnamwĩvĩtĩie Yeova, na nditonya kũalyũka.’
Mwĩĩtu wa Yevitha amanya ĩũlũ wa wĩvĩto wa ĩthe wake, o nake mbee nĩweewie kyeva. Nũndũ ũu woonanasya kana no mũvaka atie ĩthe na anyanyae. Na aitũmĩa mĩthenya yonthe ya thayũ wake kũmũthũkũma Yeova ĩeemanĩ yake yĩla yaĩ Silo. Nũndũ wa ũu amwĩa ĩthe: ‘Kethĩwa nũnamwĩvĩtĩie Yeova, no nginya wĩanĩsye.’
Kwoou mwĩĩtu wa Yevitha athi Silo, na atũmĩa mĩthenya yonthe ya thayũ wake kũmũthũkũma Yeova ĩeemanĩ yake. Namo aka ma Isilaeli nĩmaendaa kũmũkethya kũu mĩthenya ĩna kĩla mwaka, na kũtana vamwe nake. Andũ nĩmamwendete mwĩĩtu wa Yevitha nũndũ aĩ mũthũkũmi mũseo mũno wa Yeova
Asili 10:6-18; 11:1-40.
Makũlyo
- Yevitha nũũ, na aĩ kw’o ĩvinda yĩva?
- Nĩ wĩvĩto wĩva Yevitha weevĩtĩe Yeova?
- Nĩkĩ Yevitha wakwatiwe nĩ kyeva yĩla wasyokie mũsyĩ kuma ũsindinĩ wake ĩũlũ wa Aamimoni?
- Mwĩĩtu wa Yevitha aisye ata yĩla wamanyie ũvoo wa wĩvĩto wa ĩthe?
- Andũ mendete mwĩĩtu wa Yevitha nĩkĩ?
Makũlyo ma kwongeleela
- Soma Asili 10:6-18.
Nĩ ũkany’o mwaũ twaĩlĩtwe nĩkũkwata kumana na mwĩkalĩle wa Aisilaeli wa kwĩthĩwa mate aĩkĩĩku kwa Yeova? (Asi. 10:6, 15, 16; Alo. 15:4; Ũvu. 2:10)
- Soma Asili 11:1-11, 29-40.
Twĩsĩ ata kana yĩla Yevitha wanenganie mwĩĩtu wake ta “nthembo ya kũvĩvw’a” ũu ndwoonanasya kana aĩ amumye ta nthembo ya kũvĩvw’a na mwaki? (Asi. 11:31; Ali. 16:24; Kũt. 18:10, 12)
Yevitha anenganie mwĩĩtu wake ta nthembo kwa nzĩa myaũ?
Tũtonya kwĩmanyĩsya kyaũ kũmana na woni wa Yevitha kwelekela wĩvĩto wake kwa Yeova? (Asi. 11:35, 39; Mũta. 5:4, 5; Mt. 16:24)
Mwĩĩtu wa Yevitha nĩ ngelekany’o nzeo ata kwa Aklĩsto ma mũika ĩũlũ wa kũatĩĩa wĩa wa kũmũthũkũma Ngai ĩvinda yonthe? (Asi. 11:36; Mt. 6:33; Avi. 3:8)
