MAARE xaayeechiʼi xbʼaanunkil junaq li naʼlebʼ malaj kʼanjel. Ut naq kiwulak xkutankil xkʼeebʼal li xaayeechiʼi xchʼaʼajkoʼk tana chaawu xbʼaanunkil. Aʼan kixkʼul laj Jefte, li winq li wank saʼ li eetalil, joʼkan naq ra saʼ xchʼool. Laj Jefte kaw chaq ribʼ chi yalok ut kiwank choʼq aj raqol aatin.

Laj Jefte kiwank saʼ xkutankil naq ebʼ laj Israel inkʼaʼ chik nekeʼxloqʼoni li Jehobʼa ut yookebʼ xbʼaanunkil li maaʼusilal. Joʼkan naq li Jehobʼa kixkanabʼ naq teʼrahobʼtesiiq xbʼaanebʼ laj Amon. Ebʼ laj Israel keʼxye re li Jehobʼa: ‹Xoomaakobʼk chaawu. Chooʼaakol, bʼaanu usilal!›

Ebʼ laj Israel inkʼaʼ sa nekeʼreekʼa ribʼ, xbʼaan naq yookebʼ xbʼaanunkil li maaʼusilal. Joʼkan naq keʼok wiʼ chik xloqʼoninkil li Jehobʼa joʼkan naq li Jehobʼa kixtenqʼahebʼ.

Ebʼ laj Israel keʼxsikʼ laj Jefte re naq tjolominq saʼ xyanqebʼ saʼ li yalok. Ebʼ laj Israel teʼyaloq rikʼinebʼ laj Amon. Laj Jefte kiraj naq li Jehobʼa ttenqʼank re. Joʼkan naq kixye re li Jehobʼa: ‹Wi taakʼe saʼ wuqʼ ebʼ laj Amon, tinqʼaxtesi aawe li t-elk chaq xbʼeenwa chinkʼulbʼal naq tinsutqʼiiq saʼ wochoch›.

Li Jehobʼa kirabʼi li kixye laj Jefte ut kixtenqʼa. Naq laj Jefte kiwulak saʼ rochoch, ma nakaanaw ani kiʼelk chi xkʼulbʼal? Li xrabʼin kiʼelk chaq chi xkʼulbʼal. Jun ajwiʼ xrabʼin laj Jefte. Joʼkan naq kiʼok chi yaabʼak ut kixye: ‹At inrabʼin, kʼajoʼ narahoʼk inchʼool aabʼaan! Xinkʼe li waatin re li Jehobʼa, joʼkan naq tento tinkʼe li xinyeechiʼi re›.

Naq li xrabʼin laj Jefte kixnaaw li xyeechihom li xyuwaʼ, kirahoʼk ajwiʼ saʼ xchʼool. Xbʼaan naq tixkanabʼ li xyuwaʼ ut ebʼ li ramiiw. Ut tkanaaq chi junajwa saʼ Rochoch li Jehobʼa. Chirix chik aʼan kixye re li xyuwaʼ: ‹Wi xaakʼe laawaatin re li Jehobʼa tento naq taabʼaanu li xaayeechiʼi re›.

Joʼkan naq li xrabʼin laj Jefte xko Silo ut kiʼok chi kʼanjelak saʼ Rochoch li Jehobʼa. Rajlal chihabʼ ebʼ li ixqaʼal re Israel nekeʼkanaak kaahibʼ kutan rikʼin xrabʼin laj Jefte saʼ Rochoch li Yos. Ebʼ laj Israel, kʼajoʼ naq nekeʼxra li xrabʼin laj Jefte xbʼaan naq yook chi kʼanjelak chi anchal xchʼool chiru Jehobʼa.