NGA wasia kala nsilu kwa muntu yo mona vo diampasi mu lungisa wo? O muntu una va fwaniswa kiaki wavanga wo, ekiaki i kuma kakendalele. Mfundisi a Isaele nkumbu andi Yefeta.

Yefeta wazinganga mu ntangwa ina Aneyisaele ke basambilanga diaka Yave ko. Bavanganga diaka o bi. Ikuma, o Yave wayambula esi Amone babamwesa e mpasi. Ediadi diabafila mu kazila Yave oku vo: ‘Tusumukini kweto, utuvuluza, do.’

O nkangu bakendalele mu bi bavanga. Bavutukidi diaka sambila Yave. Muna kuma kiaki o Yave ubasadisi.

O nkangu usolele Yefeta mu nwanisa esi Amone. O Yefeta wazola vo Yave kansundisa e vita. Ikuma, osididi Yave o nsilu vo: ‘Ovo unsundisi e vita yo wan’a Amone, ozevo vava mvutuka, o muntu antete ovaika muna nzo ame muna kunkika, ikumvana kwa ngeye.’

O Yave owidi nsilu a Yefeta. Unsundisi e vita. Vava kavutuka kuna nzo, ng’ozeye muntu antete wankika? Mwan’andi ankento, mwan’andi wamosi kaka. O Yefeta okazidi vo: ‘Ekwe, e mwan’ame! Nkia nkenda untwasidi. Kadi yasila nsilu kwa Yave, kilendi vutuka ko.’

Vava mwan’a Yefeta kawa o nsilu wau, yandi mpe wakendalala. Kadi diasonganga vo kafwete sisa s’andi ye akundi andi, yo kwenda sadila Yave muna zingu kiandi kiawonso muna saba kiandi kuna Silo. Ikuma wavovesa o s’andi vo: ‘E tata avo osidi Yave o nsilu, ofwete wo lungisa.’

Ozevo, mwan’a Yefeta wayenda kuna Silo yo sadila Yave muna zingu kiandi kiawonso muna saba kiandi. O wan’amakento a Isaele, mvu ke mvu bayendanga mu kembesa mwan’a Yefeta wa Mungiladi, lumbu yá muna mvu. O nkangu watoma zolanga mwan’a Yefeta kadi selo kiambote kia Yave kakala.