Icisimicisyo 53: Ukulaya Kwakwe Yefita
ULINGALAYEPO ubulayo eli panuma bwakatasya ukulama? Umwalalume ali mu cikope efi acitile, kabili e mulandu abombomanina. Uyu mwalalume musololwesi umusipile uwa baIsilaeli, isina lyakwe ni Yefita.
Yefita alekala pa mpindi abaIsilaeli tabapempelapo baYehoba. Nakabili balukucita ifyakubifya. Pano baYehoba baleka abaAmono ukubasomesya. Ici calenga abaIsilaeli ukulilila kuli baYehoba ati: ‘Twabifya kuli mwebo. Tulukumukombeteleni ati nga mutupulusye!’
Abantu basaasa pa fyakubifya bacita. Balanga ati basaasa pa kutatika ukupempela baYehoba nakabili. BaYehoba babofwa nakabili.
Yefita asalululwa ne bantu pakuti bangalwa ne baAmono imbifi. Yefita alukufwaisya ukwakuti ati baYehoba bamofwe mu nkondo. Pano alaya baYehoba ati: ‘Kani mwebo icine mukapele nebo abaAmono, lomba pakaba ati umuntu uukafuma mu ŋanda yanji mu kuncinsya pa kubwela nebo ku nkondo nkamupela kuli mwebo.’
BaYehoba bakutika ukulaya kwakwe Yefita, kabili bamofwa ukucimfya. Ili Yefita abwela ku ŋanda, kani waisiba uwatatikilepo ukufuma mu kumucinsya? Mwana wakwe umwanakasi, e mwana lukoso akwete. Yefita alila ati: ‘Yo, we mwana wanji umwanakasi! Efi waleta pali nebo ukubombomana. Pakuti nalaya baYehoba, kabili tekuti mbwelele panuma.’
Ili umwana wakwe Yefita umwanakasi aisiba ubulayo bwa bawisi, mu kutanga lukoso abombomana naye. Pakuti ico caalula ukweba’ti akasya bawisi ne babyakwe. Pano ali ne kupyungila baYehoba mwi sema lya ku Silo umweo wakwe onse. Pano aeba bawisi ati: ‘Kani mwalaya baYehoba ubulayo, mulyelelwe ukubulama.’
Popele umwana wakwe Yefita umwanakasi aya ku Silo, apyungila baYehoba mwi sema lyabo umweo wakwe onse. Abanakasi ba mu Isilaeli balayako insiku sine cila mwaka mu kumubona, kabili balaba ne mpindi yakusangalala pamo. Abantu bamutemwa umwano’mwanakasi uwakwe Yefita nipakuti mupyungisi umuweme uwa baYehoba.
Abasololwesi 10:6-18; 11:1-40.
Ifyakwipusya
- Mba Yefita ninani, kabili niyisa mpindi aikeleko pa calo?
- Nikwisa kulaya Yefita alaya baYehoba?
- Mba nindo Yefita abombomanina ili abwela ku ŋanda panuma yakucimfya abaAmono?
- Ili aisiba ukulaya kwa bawisi, findo umwano’mwanakasi uwakwe Yefita alabila?
- Mba nindo abantu bamutemenwa umwano’mwanakasi uwakwe Yefita?
Ifyakwipusya na fimbi
- Pendeni Abasololwesi 10:6-18.
Mba nikwisa kucenjesya tungasambililako kuli fifilya abaIsilaeli tabali ne cicetekelo kuli baYehoba?
- Pendeni Abasololwesi 11:1-11, 29-40.
Kani tulisi syani ati filya Yefita apele umwana wakwe umwanakasi “umulambu wakoca” tacapilibwilepo ati alimocele mu mulilo? (Sol. 11:31; Lef. 16:24; Ndute. 18:10, 12)
Mba nimuli isa’nsila Yefita apeele umwana wakwe umwanakasi koti mulambu?
Koti twasambililako indo ku mibelo yakwe Yefita ili alapile umulapo kuli baYehoba? (Sol. 11:35, 39; Uwaku. 5:4, 5; Mat. 16:24)
Umwana wakwe Yefita umwanakasi ali syani cakubwenako ku baKlistu abanike abalukufwaisya ukupyungila baLesa impindi yonse? (Sol. 11:36; Mat. 6:33; Filip. 3:8)
