THU i tiamin a hnuah hlen har i ti leh ngai em? He milema mipa hlan harsa a ti a, chuvangin a lungngai a ni. Mipa hi Israel roreltu huai, a hming Jephtha a ni.

Israel-miten Jehova an biak tawh loh hnuah Jephtha a lo awm a. Thil tha lo chu an ti leh a. Chuvangin Jehovan anmahni chu Ammon mipuite tihnatin a awmtir a ni. Chu chuan Israel-mite chu Jehova hnenah: ‘I lakah kan lo sual a ni. Khawngaih takin min chhandam rawh,’ tiin a autir a ni.

Mipuite chuan an tih tawh thil tha lo chu pawi an ti a. Jehova be lehin pawi an tihzia chu an lantir a. Chuvangin Jehovan anmahni a pui leh a.

Jephtha chu Ammon mi tha lote do tura mipui thlan a ni. Jephtha chuan indona tanpuitu atan Jehova a duh em em a. Tichuan Jehova hnenah thu a tiam a; ‘Ammon-mite chunga hnehna mi pek dawn chuan, hnehna nena ka haw huna mi hmuak tura ka in atanga lo chhuak hmasa ber chu i hnenah ka pe ang,’ tiin.

Jehovan Jephtha thutiam chu a ngaithla a, hnehna chang turin a tanpui a. Jephtha a lo hawin tunge amah hmuak tura lo chhuak hmasa ber i hria em? A fa neih chhun, a fanu chu a ni. ‘Aw ka fanu! Eng lungngaihna nge mi neihtir le. Mahse Jehova hnenah thu ka tiam tawh a, ka sut leh thei lo,’ tiin Jephtha a tap a.

Jephtha fanuin a thutiam chungchang a hriatin, a tirah chuan a lungngai ve zet a. A pa leh a thlante a kalsan dawn tihna a ni si a. A dam chhung chu Shiloh-a a biakbukah Jehova rawngbawl nan a hmang zo ang. Tichuan: ‘Jehova hnenah thu i tiam tawh chuan i hlen tur a ni,’ tiin a pa a hrilh ta a.

Tichuan Jephtha fanu chu Shiloh-ah a kal a, a dam chhung chu Jehova rawngbawl nan a biakbukah a hmang zo va. Kum tina ni li zel, chutah chuan Israel hmeichhlaten an va tlawh thin a, an hlim ho thin. Chutianga Jehova chhlahhlawh tha chu a nih avangin miten Jephtha fanu chu an hmangaih hle a.