¿O TXI tqʼmaʼnxiye jun tyola aju kwest japunatl tuʼne? Ik bʼaj tiʼj xjal tkuʼx tuj tilbʼilal tzalu, tuʼntzunju tzaj tbʼis. Jefté tbʼi xjal lu, jun jwes te Israel aju mitiʼ tzaj xobʼ.

Anqʼin Jefté toj jun ambʼil jatumel mitiʼ nchi kʼulinteqtl aj Israel twitz Jehová. Otaq chi ok ten juntl maj bʼinchel il. Tuʼntzunjo, tzaj tqʼoʼn Jehová ambʼil kye aj Amón tuʼn tok kybʼinchaʼn mya bʼaʼn kyiʼj. Xitzun kyqanen aj Israel onbʼil te Jehová ex kyqʼama: ‹Ma qo bʼinchane il twitza. ¡Qo tkloma!›

Tzaj kybʼis xjal tuʼnjo mya bʼaʼn otaq kubʼ kybʼinchan. Kubʼ kyyekʼin jlu tukʼejo e nimen juntl maj te Jehová. Tuʼntzen jlu, e tzaj tonintl Jehová.

Jaw kyjyoʼn aj Israel Jefté tuʼn t-xiʼ bʼiyel kyiʼj qejo mya bʼaʼn xjal te Amón. Tajbʼil Jefté tuʼn ttzaj onin tuʼn Jehová. Tuʼntzunju, xi ttziyen te Jehová: ‹Qa ma chin tzaj tonina tuʼn nkambʼane, ok kxel nqʼoʼne teya aju kʼeletz tnejel tuj njaye kʼamol weye ok wul meltzʼaje tuj qʼoj›.

Tzaj tbʼiʼn Jehová tyol Jefté ex tzaj tonen tuʼn tkambʼan. Tej tul meltzʼaj Jefté tja, ¿bʼiʼn tuʼne alkye tnejel xjal etz kʼamolte? Aju oʼkxku jun tmeʼl. ‹¡Ay, nmeʼjel!› Chi Jefté noqʼtaq. ‹¡Nimxix nbʼise ma tzaj tuʼna! Quʼn ma txi ntziyane te Jehová ex iltiʼj tuʼn tjapun wuʼne›.

Tej tbʼi tmeʼl Jefté aju otaq txi ttziyen ttat, tnejel tzaj tbʼis tuʼn jlu, tuʼnjo melaytoq tentl kyukʼe tman ex kyukʼe tamiw. Pero kʼajbʼel toj tja Jehová toj tkyaqil tanqʼibʼil atz Siló. Xitzun tmaʼn te Jefté: ‹Qa ma txi tqʼamaʼn jun tyole te Jehová, iltiʼj tuʼn tjapun tuʼna›.

Xiʼtzun tmeʼl Jefté ajbʼel toj tja Jehová atz Siló ajxitaq tkyim. Ncheʼxtaq xuʼj kyaje qʼij tuj junjun abʼqʼi tukʼil tmeʼl Jefté ex kykyaqil nchi tzalajtoq junx. Kʼujlaʼntoq tmeʼl Jefté kyuʼn xjal, tuʼnju tbʼanel ajbʼelteq te Jehová.