TLAPOUALISTLI 53

Jefté okitemakak itlajtol

¿KEMANTIKA otikijto itlaj tikchiuas uan satepan otikitak oui tikchiuas? Ijkon okipanok tlakatl tlen tikita itech tlaixkopinal, ik non, moyolkokoa miak. Ye Jefté, se juez yolchikauak tlen okatka itech Israel.

Jefté onemia itech tonalmej ijkuak israelitas ayakmo okiueyichiuayaj Jehová. Oksepa okichijtokaj tlen amo kuali. Ik non, Jehová okinkauili tlakamej tlen ochantiayaj itech Amón ma kintlajyouiltikan israelitas. Israelitas okitlatlaujtijkej Jehová: ‘Yotitlajtlakojkej moixpan. ¡Timitstlatlaujtia, xitechmakixti!’.

Israelitas omoyolkokojkej pampa okichijkej tlamantli tlen amo kuali. Ijkon okiteititijkej ijkuak oksepa okiueyichijkej Jehová. Ik non, Jehová oksepa okinpaleui.

Israelitas okipejpenkej Jefté pampa ma moteui iuan amo yolkualmej amonitas. Jefté okinekiaya ma kipaleui Jehová ijkuak moteuiskia. Ik non, Jefté okimakak itlajtol Jehová: ‘Tla te tikchiua ma nitlatlani, nimitsmakas akin achto kisas nokalijtik uan nechnamikiti ijkuak niualmokuepas’.

Jehová okikak itlajtol Jefté, uan okipaleui ma tlatlani. Ijkuak Jefté omokuepki ikalijtik, ¿tikmati akin achto okiski okinamikito? San se ichpoch tlen okipiaya. Jefté ochokak uan okijto: ‘¡Ay, nochpoch! ¡Nimoyolkokoa! Pampa onikmakak toTajtsin Dios notlajtol, uan axkan moneki ijkon nikchiuas ken onikilui Jehová’.

Ijkuak ichpoch Jefté okimatki itech tlajtoli tlen Jefté okitemakak, omoyolkoko, pampa kikauaskia itajtsin uan iyolikniuan. Maski ijkon, nochi iyolilis kitekichiuiliskia Jehová itech tabernáculo tlen okatka Siló. Ichpoch Jefté okijto: ‘Tla ijkon otikilui Jehová, moneki ijkon tikchiuas’.

Ik non, ichpoch Jefté oyajki Siló, uan ompa nochi iyolilis okitekichiuili Jehová itech itabernáculo. Siuamej israelitas okitlajpaloayaj naui tonal sejse xiuitl uan ijkon kuali omotlapouiayaj. Israelitas okitlasojtlayaj ichpoch Jefté pampa ye kuali okitekichiuiliaya Jehová.

Jueces 10:6-18; 11:1-40.