NGOYE owa ninga nale mbela euvaneko nokonima olya ka ninga edhigu oku li gwanitha? Osho omulumentu nguka mefano a ningi, nosho molwashoka ye e uvite eyeme ngawo. Omulumentu oye ependa omutokolihapu gwaIsrael. Edhina lye oJefta.

Jefta oku li methimbo ndyono Aaisrael itaa galikana we Jehova. Yo otaa longo ishewe iinima ya puka. Ano Jehova ota pitika opo aantu yokuAmmon ye ya ninge nayi. Oshi ithanitha Aaisrael Jehova: ‘Tse otwa yono kungoye. Alikana tu hupitha!’

Oshigwana oshu uvite ohenda kombinga yiinima iiwinayi mbyoka sho sha ningi. Sho otashi holola kutya sho oshu uvite ohenda mokugalikana ishewe Jehova. Ano Jehova ote ya kwatha ishewe.

Oshigwana otashi hogolola Jefta a ka kondjithe Aayamoni aawinayi. Jefta okwa hala noonkondo Jehova e mu kwathe molugodhi. Ano ye otu uvanekele Jehova: ‘Ngele to gandja Aayamoni miikaha yandje, ngame otandi ke ku pa omuntu gwotango ngoka ta zi megumbo lyandje ta hambelele ndje mokugaluka kwandje.’

Jehova ota pulakene keu-vaneko lyaJefta note mu kwatha a sindane. Owa tseya mbela kutya olye ta zi mo tango okutsakaneka Jefta? Oye omwanakadhona epona lye. ‘Akutu, omumwandje!’ Jefta ti igidha. ‘Oto yematithile ndje shike ngeyi! Ihe ngame onda ninga euvaneko kuJehova, noitandi vulu oku li ningulula.’

Tango sho omwanakadhona gwaJefta tu uvu euvaneko lye, naye wo ota ye-mata. Oshoka otashi ti kutya ye oku na okuthiga po he nookuume ke. Ihe ye ota ka longela Jehova moshihupe sho-nkalamwenyo ye metsalihangano lye muSilo. Ano ye ota ti kuhe: ‘Ngele tate owa ninga euvaneko kuJehova, ou na oku li gwanitha.’

Ano omwanakadhona gwaJefta ota yi kuSilo, nota longele Jehova oshihupe shonkalamwenyo ye hoka ketsalihangano. Omasiku gane omvula kehe aakiintu yokuIsrael ohaa yi ye ke mu talele po hoka nohaa nya-nyukilwa pamwe naye. Oshi-gwana oshi hole omwa-nakadhona gwaJefta, oshoka ye omulongeli gwaJehova omwaanawa.