Okuraganisa kwa Yefusa
Ekitebyo 53
Okuraganisa kwa Yefusa
OKABA orakozireho okuraganisa kandi bwanyima okakishanga kigumire kukihikiiriza? Ogu mushaija omu kishushani eki akakikora, kandi niyo nshonga ahabw’enki aine amaganya mingi. Omushaija ogu orikwetwa Yefusa n’omuramuzi emanzi omuri Israeli.
Yefusa akaba ariho omu bunaku obu Abaisraeli baabaire batakiramya Yehova. Kandi bagarukiremu kukora ebibi. N’ahabw’ekyo Yehova aikiriza abantu ba Amoni kubakora kubi. Eki kireetera Abaisraeli kutakira Yehova bati: ‘Tusiisire ahariiwe. Twakweshengyereza, tujune!’
Abantu nibashaasha munonga ahabw’ebibi ebi baakozire. Booreka okushaasha kwabo barikugaruka kuramya Yehova. N’ahabw’ekyo Yehova agaruka abahwera.
Abantu batoorana Yefusa kubeebembera okurwanisa Abaamoni ababi. Yefusa naayenda munonga Yehova amuyambe omu kurwana. N’ahabw’ekyo araganisa Yehova ati: ‘Ku orampe obusinguzi aha Baamoni, omuntu oribanza kushohora kuruga omu nju yangye kumbugana ninduga omu rugamba, ndyamukuha.’
Yehova ahurikiza eshaara ya Yefusa, kandi amuhwera okuhika aha businguzi. Yefusa ku yaagarukire omu ka, noomanya owaabandize kwija kumubugana? N’omuhara, omwana omwe wenka ou yaabaire aine. ‘Ai bambe!, mwana wangye!’ Yefusa arira. ‘Ka wangwisiza akagwe, okandetera amaganya maingi! Kwonka nkarahira ahari Yehova kandi tindikubaasa kukireka.’
Muhara wa Yefusa ku yaaherize kumanya eby’okurahira oku, nawe omu kubanza akashaasha munonga. Ahakuba eki nikimanyisa ngu akaba naija kutsigaho ishe na banywani be. Mbwenu naaza kumara ebiro by’amagara ge goona arikuheereza omu ihema rya Yehova omuri Shiilo. N’ahabw’ekyo agambira ishe ati: ‘Ku oraabe waarahiire ahari Yehova, oine kukihikiiriza.’
Atyo muhara wa Yefusa aza Shiilo, kandi agumayo ebiro by’amagara ge goona arikuheereza Yehova omu ihema rye. Ebiro bina omu mwaka, abakazi ba Israeli bakaba baija kumutaayaayira, kandi bashemererwa bari hamwe nawe. Abantu nibakunda muharawa Yefusa ahabw’okuba n’o muheereza murungi wa Yehova.
