¿XKÄ ja nꞌa rä kohi näꞌä mꞌe̱fa bi jaꞌi xä ñhei gi kumpli? Geꞌä bi thogi nuni rä ñꞌo̱ho̱ gi handi ha rä kꞌoi, hänge xa turämu̱i. Rä thuhu Jefte, nuni mrä nzaya ha Israel ꞌne himi tsu.

Rä Jefte bi mꞌu̱ ha nuꞌu̱ yä pa habu̱ yä israelita ya himi xo̱kämbeni Jeoba ꞌne mänꞌaki mi pe̱fi yä tsꞌo tꞌo̱tꞌe. Hänge Jeoba bi hyopi yä me Amon bi yꞌo̱tpäbi yä ntsꞌomꞌu̱i. Yä israelita bi yꞌapäbi rä mfatsꞌi Jeoba ꞌne bi ꞌñembi: “Xtä pe̱fihe yä tsꞌoki kontra nuꞌi. ¡Ñängägihe!”.

Yä israelita udi ge xa tuyämu̱i ꞌne di yobri po nuꞌu̱ yä tsꞌoki xä yꞌo̱tꞌe. Hänge, mänꞌaki bi xo̱kämbeni Jeoba. Jeoba bi matsꞌi mänꞌaki.

Yä israelita bi huahni rä Jefte pa go dä ntunkui nuꞌu̱ yä me Amon. Rä Jefte xa ne dä me̱ꞌtsi rä mfatsꞌi Jeoba. Hänge bi ja nꞌa rä kohi ko Jeoba ꞌne bi ꞌñembi: “Mu̱ nuꞌi gi faxkägi gä tähä nunä rä tuhni, ma gä rꞌaꞌi näꞌä toꞌo mꞌe̱tꞌo dä bo̱ni de mä nguu pa dä däkägi nuꞌmu̱ xkä pengi de nunä rä tuhni”.

Jeoba bi yꞌo̱de näꞌä rä kohi bi ja rä Jefte, ꞌne bi matsꞌi bi dähä näꞌä rä tuhni. Mi mengi rä Jefte ha rä nguu, ¿gi pädi toꞌo bi bo̱ni mꞌe̱tꞌo pa bi dädi? Rä tꞌixu. Rä Jefte himi pe̱ꞌtsi märꞌa yä bätsi, hänge bi nzoni ꞌne bi ꞌñenä: ¡Zi tꞌixu! ¡Hängu rä dumu̱i di rꞌakägi! Pe nuga xtä ja nꞌa rä kohi ko rä Zi Dada Jeoba ꞌne pe̱ꞌtsi gä kumplibi”.

Mi bädi näꞌä rä tꞌixu rä Jefte de näꞌä rä kohi xki ja rä dada, ri mu̱di xi bi durämu̱i ꞌnehe, ngeꞌä mi pädi ge pe̱ꞌtsi te dä zogi rä dada ꞌne yä ntsitsꞌi. Pe nubye̱ pa nzäntho ma xä mꞌu̱i ha Silo, ha rä tabernäkulo Jeoba. Hänge bi ꞌñembäbi rä dada: “Mu̱ nuꞌi gä ja nꞌa rä kohi ko rä Zi Dada Jeoba, pe̱ꞌtsi te gi kumpli”.

Hänge nubye̱ rä tꞌixu rä Jefte bi ma pa Silo, bi me̱päbi Jeoba ha rä tabernäkulo asta xa bi du. Goho yä pa tatꞌä je̱ya, yä ꞌme̱hñä de Israel mi pa mi kꞌäni rä tꞌixu rä Jefte. Mi muntsꞌi pa dä johya mähye̱gi. Yä israelita mi mädi rä tꞌixu rä Jefte, ngeꞌä nunä rä nxutsi xa mi pe̱päbi xä ñho rä Zi Dada Jeoba.