BO A yega di hasi un promesa anto despues haña ku ta difísil pa kumpli kuné? E hòmber riba e plachi aki a pasa den esei, i p’esei e ta asina tristu. E hòmber ta e hues balente di Israel ku yama Jefte.

Jefte a biba na un tempu ora ku e israelitanan no tabata adorá Yehova mas. Nan tabata hasi loke ta malu atrobe. P’esei Yehova a laga hende di Amon hasi nan daño. Dor di esei e israelitanan a sklama na Yehova bisando: ‘Nos a peka kontra bo. Salba nos, por fabor!’

E pueblo a sinti duele di e kosnan malu ku nan a hasi. Nan a mustra ku nan a sinti duele dor di bolbe adorá Yehova. Anto p’esei Yehova a yuda nan atrobe.

E pueblo a skohe Jefte pa bringa kontra e amonitanan malbado. Jefte a deseá masha pa Yehova yud’é den e bataya. P’esei el a primintí Yehova: ‘Si bo duna mi viktoria riba e amonitanan, e promé persona ku sali for di mi kas pa kontra mi ora mi bolbe for di e viktoria, lo mi duna na bo.’

Yehova a skucha e promesa di Jefte, i a yud’é gana e viktoria. Ora ku Jefte a yega kas bèk, bo sa ken tabata e promé persona ku a sali pa bin kontr’é? Esei tabata su yu muhé, su úniko yu. ‘Ai mi yu!’ Jefte a sklama. ‘Ki un tristesa bo ta kousa mi. Pero, mi a hasi un promesa na Yehova, i mi no por nenga di kumpli kuné.’

Ora e yu muhé di Jefte a tende di su promesa, e tambe a keda tristu na prinsipio, pasobra esei a nifiká ku e tabatin ku bandoná su tata i su amiganan. Pero e lo a pasa e restu di su bida sirbiendo Yehova na su tabernakel na Silo. Pues el a bisa su tata: ‘Si bo a hasi un promesa na Yehova, bo tin ku kumpli kuné.’

Pues, e yu muhé di Jefte a bai Silo, i a pasa e restu di su bida sirbiendo Yehova na su tabernakel. Tur aña, e hende muhénan di Israel tabata bai bishit’é pa kuater dia, i nan tabata pasa e dianan kontentu huntu. E pueblo a stima e yu muhé di Jefte pasobra e tabata asina un bon sirbidó di Yehova.

Huesnan 10:6-18; 11:1-40.