WASWE, enitaem iu mekem wanfala promis and bihaen iu faendem hem hard tumas for duim samting wea iu promis for duim? Disfala man insaed long piksa hem duim olsem, dastawe hem feel sorre tumas. Disfala man hem Jephʹthah, wanfala judge bilong Israel wea no fraet.

Jephʹthah hem stap long wanfala taem wea olketa Israelite no gohed for worshipim Jehovah. Olketa gohed for duim samting wea nogud. So Jehovah letem pipol bilong Amʹmon for spoelem olketa. Diswan mekem olketa Israelite singaot go long Jehovah: ‘Mifala sin againstim iu. Plis, sevem mifala!’

Olketa pipol feel sorre for olketa nogud samting wea olketa duim. Olketa showimaot olketa sorre long wei wea olketa worshipim Jehovah moa. So Jehovah helpem olketa moa.

Olketa pipol chusim Jephʹthah for faet againstim olketa nogud Amʹmon·ite. Jephʹthah hem laekem tumas for Jehovah helpem hem long faet. So hem promisim Jehovah: ‘Sapos iu mekem mi winim olketa Amʹmon·ite, first wan wea kamaot from haos bilong mi for meetim mi taem mi kam bak, mi bae givim hem long iu.’

Jehovah herem promis bilong Jephʹthah, and hem helpem hem for winim datfala faet. Taem Jephʹthah kam bak long haos, iu savve hu nao first wan wea kamaot for meetim hem? Hem nao dota bilong hem, only pikinini bilong hem. Jephʹthah hem singaot olsem: ‘Oh, dota bilong mi! Iu mekem mi feel sorre tumas. Bat mi mekem promis finis long Jehovah, and mi kanduit for tekem bak.’

Taem dota bilong Jephʹthah hem savve long promis bilong hem, firstaem hem tu feel sorre. From diswan minim hem mas lusim dadi and olketa fren bilong hem. And hem bae spendem full laef bilong hem for servem Jehovah long tabernacle bilong hem long Shiʹloh. So hem sei olsem long dadi bilong hem: ‘Sapos iu mekem wanfala promis long Jehovah, iu mas duim samting wea iu promis for duim.’

So, dota bilong Jephʹthah hem go long Shiʹloh, and hem spendem full laef bilong hem for servem Jehovah long tabernacle bilong hem. Fofala day evri year olketa woman long Israel savve go for visitim hem long there, and olketa savve enjoyim gudfala taem tugeta. Olketa pipol lovem dota bilong Jephʹthah bikos hem barava gudfala servant bilong Jehovah.