Jefté parlasqan
53 yachachiy
Jefté parlasqan
¿MAYKʼAQLLAPIS parlasqaykita juntʼanaykipaq mayta ñakʼarirqankichu? Kay runaqa parlasqanmanta, llakisqa kachkan. Payqa mana imata manchachikuq israelmanta juez karqa, Jefté sutikun.
Jefté kawsakuchkaptin israelitasqa mana Jehovata kasukuqchu kanku. Watiqmanta saqrayarqanku. Chayrayku Jehová Amón llaqta israelitasta usuchinanta saqin. Israelitastaq jinata Jehovamanta mañakurqanku: ‘Diosniyku, contraykipi juchallikuyku. ¡Salvawayku!’, nispa.
Israelitasqa saqrayasqankumanta sunqunta nanachikunku. Chayta Jehovata watiqmanta yupaychaspa rikuchinku, Jehovataq juktawan paykunata yanapan.
Israelqa saqra amonitaswan maqanakunanpaq Jefteta akllarqa. Jefté Jehovap yanapayninta mayta mañakurqa. Chayrayku, Jehovaman jinata nirqa: ‘Sichus amonitasta atipayta yanapawanki chayqa, pichá ñawpaqta wasiymanta taripawaq lluqsimuqta qusqayki’, nispa.
Jehová Jefté mañakuyninta uyarispa, atipayta yanaparqa. Jefté kutimuptintaq, ¿Pichus ñawpaqta taripaq lluqsimusqanta yachankichu? Kʼata ususin. Chayrayku Jefteqa, ‘¡Ay, waway!’, nispa waqarikun. ‘¡Qamniqta jatun llakiypi rikhurini! Chaywanpis kunanqa parlasqayta Jehová Diosman, qusaq nisqayta juntʼanay tiyan’, nispa nillantaq.
Jeftep ususin chay parlasqanmanta yachaspa, phutikullantaq. Payqa wañupunankama Jehovap toldonpi Silopi llamkʼananpaq, tatanta, mamanta, munasqa masisninta ima, saqinan karqa. Chaywanpis Jefteman nirqa: ‘Tatay, ñuqamanta Jehovaman imatachus nisqaykitaqa, juntʼanayki tiyan’, nispa.
Chayrayku Jeftep ususinqa Siloman ripurqa, chaypitaq wañupunankama Diosta yupaychaspa kakun. Israelmanta warmikunaqa sapa wata tawa pʼunchayta watukuq riq kanku, chaypitaq paywan kusirikuq kanku. Israelitasqa Jehová Diospa kamachin kasqanrayku, Jeftep ususinta mayta munakurqanku.
