¿LA ABʼANOM jumul che kʼo jun xatzujuj tekʼuriʼ katkun ta chi che ubʼanik? Jewaʼ xubʼan ri jun achi kʼo pa ri wachbʼäl, rumal laʼ sibʼalaj kbʼisonik. Are Jefté, jun achi che xuxibʼij ta ribʼ xuqujeʼ xubʼan juez rech Israel.

Jefté xkʼaseʼ pa täq ri qʼij chiʼ ri täq israelitas kkeya ta chi uqʼij ri Jehová. Tijan kkebʼan chi ri itzelal jumul (jyak) chik. Rumal laʼ Jehová xuya chike ri winaq rech Amón che kkebʼan kʼäx chike ri israelitas. Rumal laʼ ri täq israelitas xkebʼij wariʼ che Jehová: ‹Xqabʼan qamak chawe. ¡Chojatoʼ!›

Ri winaq sibʼalaj kʼäx xkenaʼ rumal ri itzelal xkebʼano. Kkekʼut wariʼ chiʼ xkemaj chi uyaʼik uqʼij ri Jehová. Rumal laʼ, Jehová xeʼutoʼ chi jumul.

Ri tinamit xkechaʼ ri Jefté rech kchʼojin kukʼ ri itzel täq amonitas. Jefté sibʼalaj kraj che ri Jehová kutoʼ pa ri chʼoj. Rumal laʼ xutzujuj wariʼ che Jehová: ‹We kaya chwe kinchʼakanik, kinya ri nabʼe winaq chawe che kel lo pa ri wachoch che wilik chiʼ kintzalij lo pa ri chʼoj›.

Jehová xuta ri xutzujuj ri Jefté, rumal laʼ xutoʼ che uchʼakik ri chʼoj. Chiʼ Jefté xtzalij loq, ¿la awetaʼm jachin laʼ ri nabʼe winaq xel lo che rilik? Are ri qas xiw jun umiʼal. ‹¡Ay, numiʼal!› Xchaʼ ri Jefté xok pa oqʼej. ‹¡Sibʼalaj kaya jun bʼis chwe! In xinbʼan jun tzujunik che Jehová, rumal laʼ rajawaxik che kinbʼan na ri xintzujuj che Jehová.›

Chiʼ ri umiʼal Jefté xuta wajun tzujunik xubʼan ri utat, nabʼe sibʼalaj xbʼisonik, rumal che keʼuya kan ri utat unan xuqujeʼ ri täq rachiʼl. Xuqujeʼ kuqʼaxej ronojel ri ukʼaslemal che upatanexik ri Jehová pa ri tabernáculo. Tekʼuriʼ xubʼij wariʼ che ri Jefté: ‹We xabʼan jun tzujunik che Jehová, rajawaxik kabʼan wariʼ›.

Tekʼuriʼ rumiʼal Jefté xbʼe Siló, chilaʼ xuqʼaxej wi ronojel ri ukʼaslemal che upatanexik ri Jehová pa ri tabernáculo. Ri täq ixoqibʼ rech Israel kekilaʼ kajibʼ qʼij pa jun junabʼ, tekʼuriʼ konojel kkeqʼaxej wa täq qʼij riʼ rukʼ kikotemal. Ri winaq sibʼalaj xkeloqʼoqʼej rumiʼal ri Jefté rumal che wajun ali jun utzalaj ajpatinel che ri kiDios, Jehová.