I MAANI ana rai koe i tetai taputou e oti kite mai koe e kare e rauka ia koe te akono i te reira? Kua rave teia tangata i roto i te tutu i te reira, no reira aia i akara anga taitaia ei. Ko Iepheta tona ingoa, e akava toa aia no Iseraela.

Kua noo ana a Iepheta i te tuatau kare to Iseraela e akamori akaou ana ia Iehova. Te rave akaou ra ratou i te au angaanga kino. No reira a Iehova i akatika ai kia tamamaeia ratou e te ngati Amona. Na teia i akakeu i to Iseraela kia kapiki kia Iehova e: ‘Kua ara matou ia koe. Me ka tika e akaora mai ia matou!’

Kua tataraara te tangata no te au apinga kino ta ratou i rave. Kua akaari ratou i to ratou tu tataraara na te akamori akaou anga ia Iehova. E kua tauturu akaou a Iehova ia ratou.

Kua iki te tangata ia Iepheta kia tamaki atu i te iti tangata kino o te ngati Amona. Inangaro maata tikai a Iepheta kia tauturu a Iehova iaia i roto i teia tamaki. No reira kua taputou aia kia Iehova e: ‘Me oronga mai koe i te re kiaku kia autu ki rungao i te ngati Amona, ko te tangata mua ka aere mai mei roto i toku are i te aravei mai iaku me oki atu au, ka oronga atu au iaia kia koe.’

Kua akarongo a Iehova i te taputou a Iepheta, e kua tauturu iaia kia autu. I te oki anga a Iepheta ki te kainga, kua kite koe e koai te tangata mua tei aere mai ki vao i te aravei iaia? Ko tana tamaine, e ko tana tamaine okotai rai ia. ‘Aue koe e taku tamaine e!’ i aue ei a Iepheta. ‘Te taitaia maata nei au i te kite atu ia koe. Kua tia oki au kia Iehova, e kare e rauka iaku kia akakore i te reira.’

I te kite anga te tamaine a Iepheta i te taputou a tona papa, i te akamata anga kua taitaia katoa aia. No te mea ko te aiteanga, ka akaruke aia i tona papa e tona au oa. Tera ra, ka akapou aia i te toenga o tona oraanga i te tavini ia Iehova i ko i tona tapenakara, i Silo. No reira kua akakite aia ki tona papa e: ‘Me kua taputou koe kia Iehova, e akono rai koe i te reira.’

Kua aere i reira te tamaine a Iepheta ki Silo, e kua akapou i te toenga o tona oraanga i te tavini ia Iehova i ko i tona tapenakara. E a ra i te au mataiti ravarai, e atoro atu ana te au vaine o Iseraela iaia e e mataora ana ratou i te aravei anga. Inangaro tikai te tangata i te tamaine a Iepheta no te mea e tavini meitaki aia no Iehova.