Makani 53: Cisyomezyo ca Jefita
HENA kuli nowakasyomezyede kale cisyomezyo kwamana cakuyumina kucicita? Muntu ooyu uuli acifwanikiso eeci wakasyomezya, nkakaambo kaako uluuside kapati. Muntu ooyu ngu Jefita, mubetesi sicamba wa Isilayeli.
Jefita upona muciindi bana Isilayeli nibaleka kukomba Jehova. Alimwi batalika kucita zintu zibi. Aboobo Jehova walekela bana Amoni kuti babasubule. Eeci capa kuti bana Isilayeli bamulilile Jehova, bati: ‘Twabisya kuli nduwe! Twakomba kaka tuvwune!’
Bantu baluuside akaambo kazintu zibi nzyobacita. Batondezya kuti baluuside kwiinda mukukomba Jehova alimwi. Jehova alimwi wabagwasya.
Bantu bamusala Jefita kuti alwane bana Amoni babi. Jefita uyandisya kapati Jehova kuti amugwasye munkondo. Aboobo Jefita wamusyomezya Jehova kuti: ‘Ikuti undigwasye kuzunda bana Amoni, imuntu uulaataangune kuzwa muŋanda yangu kundicinga ndajoka kuzwa kukuzunda, ndilakupa.’
Jehova wamvwa kucisyomezyo ca Jefita, aboobo wamugwasya wazunda. Jefita naakajoka kumunzi, Hena ulimuzyi wakataanguna kuzwa kumucinga? Mwana wakwe musimbi alimwi ngomwana alikke luzutu ngwajisi. ‘Maawe mwanaangu, walila Jefita. Wandipenzya mebo.’ Pele ndakamusyomezya Jehova, aboobo tandikonzyi kucinca pe.’
Mwana musimbi wa Jefita naakamvwa zyacisyomezyo, awalo wakausa kumatalikilo. Nkokuti lino uya kubasiya bawisi abeenzyinyina. Pele unakubelekela buyo Jehova mubuumi bwakwe boonse kucikombelo caku Silo. Aboobo wabaambila bawisi kuti: ‘Ikuti naa mwakamusyomezya Jehova, amucite kweelana ambomwakaamba.’
Aboobo mwana musimbi wa Jefita waunka ku Silo, aboobo buumi bwakwe boonse unoobelekela buyo Jehova acikombelo. Mazuba aali one amwaka, bamakaintu bana Isilayeli balaunka kumuswaya, aboobo balakkomana kapati kuba antoomwe anguwe. Bantu balamuyanda mwana musimbi wa Jefita nkaambo mubelesi mubotu wa Jehova.
Babetesi 10:6-18; 11:1-40.
Mibuzyo
- Ngwani Jefita, alimwi nciindi nzi ncaakapona?
- Ncisyomezyo nzi Jefita ncaakasyomezya Jehova?
- Nkaambo nzi Jefita ncaausila naajoka kumunzi naazwa kukuzunda bana Amoni?
- Ncinzi mwana wa Jefita ncaamba naazyiba cisyomezyo ncobakasyomezya baswaabo?
- Nkaambo nzi bantu ncobamuyandila mwana wa Jefita?
Mibuzyo aimwi
- Bala Babetesi 10:6-18.
Nkucenjezyegwa kuli nkotweelede kubikkila maano twalanga bana Isilayeli mbobatakali kusyomeka kuli Jehova? (Bab. 10:6, 15, 16; Balo. 15:4; Ciy. 2:10)
- Bala Babetesi 11:1-11, 29-40.
Mbuti mbotuzyi kuti kupa kwa Jefita kwamwana wakwe kali “cipaizyo cakutenta” tacaambi kuti nkumupa kwiinda mukumuumpa kacili cipaizyo camuntu? (Bab.11:31; Lev. 16:24; Dt. 18:10, 12)
Muunzila nzi Jefita mbwaakapa mwana wakwe mbuli cipaizyo?
Ncinzi ncotukonzya kwiiya kuli Jefita twalanga mbwaakacita kucisyomezyo cakwe ncaakasyomezya Jehova? (Bab. 11:35, 39; Muk. 5:4, 5; Mt. 16:24)
Mbuti mwana wa Jefita mbwali cikozyanyo cibotu ku Banakristo bacili bana caboola kumakani aakunjila mulimo waciindi coonse? (Bab. 11:36; Mt. 6:33; Flp. 3:8)
