¿AY MAʼ bʼa jun ekʼele ay jas ja kʼapunej sok tsaʼan mixa xa kʼana oj akʼuluk? Jani jaw ja jas ekʼsbʼaj ja winik waxa wila bʼa dibujo, ja yuj jel tristeʼay. Yeʼnani ja Jefté, ja yeʼn jun winik mix xiwi sok jwes bʼa Israel.

Jefté ajyi sakʼan bʼa jun tyempo ja israʼelenyo mixa xyaʼteltaye ja Jyoba sok cha wane xa skʼulajel ja jasa mi lekuki. Ja yuj ja Jyoba yaʼakan ja chonabʼ Ammón akʼulajuk yile bʼa mi lekuki. Ja yuj ja israʼelenyo wa spatawe yi skʼujol ja Jyoba: «Jleʼata jmultikon amok. ¡Koltayotikon!».

Ja ixuk winiki mixa ni lek ay xyabʼye yuja jastik mi lekuk skʼulunejeʼi, sok wa sjeʼawe wa snaʼawe malaya ja yajni yajkʼachil ekʼele wa xkʼe yaʼteltaye ja Jyoba. Ja yujil, ja Jyoba wa skoltay ja israʼelenyo.

Ja israʼelenyo stsaʼawe ja Jefté bʼa oj tiroʼanuk sok ja tantik swinkil Ammón. Jefté wani skʼana akoltajuk yuja Jyoba ja bʼa kʼakʼaneli. Ja yujil skʼapa yi ja Jyoba: «Ja ta weʼn wa jkʼul ganar ja kʼakʼaneli, oj kawi ja maʼ bʼajtan ojak staʼon ja la kumxiyon ja bʼa jnaj yajni wata jkʼulkan ganar ja kʼakʼaneli».

Jyoba smakla ja jasa skʼapa Jefté, sok skoltay bʼa oj skʼul ganar ja kʼakʼaneli. Yajni ja Jefté kumxi ja bʼa snaji, ¿wan maʼ xa naʼa machunkiluk ja maʼ eljan bʼajtan jak tajuk yuji? Jaʼita ja kechan yunin akʼixi. Jefté yala sok yokʼel: «¡Ay, kala kunin akʼixa! ¡Jel waxa waʼa och jtristeʼil! Yujni ja keʼni ayxa jas kʼapunej yi ja Jyoba, sok ja weʼgo ojni ka kʼot smeranil ja jas elel bʼa jtiʼi».

Yajni ja yakʼix ja Jefté yabʼ ja jas skʼapunej ja stati, chomajkil och stristeʼil yuja oj yakan ja stati soka yamigo jumasaʼ. Sok tixa oj ekʼuk ja sakʼanil yaʼteltajel ja Jyoba bʼa stabernáculo, bʼa chonabʼ Siló. Ja yuj ja yeʼn yala yabʼ ja Jefté: «Ta weʼn ay jasa kʼapunej yi ja Jyoba, tʼilani oj wa kʼotuka».

Ja yuj ja yakʼix ja Jefté waj man chonabʼ Siló, sok tini ekʼ tiw ja sakʼanil yaʼteltajel ja Jyoba bʼa stabernáculo. Ja akʼixuk jumasaʼ bʼa Israel wa xwaj yulataye chane kʼakʼu ja jabʼili, sok tsamal ni wa x-ekʼyujile lajana. Ja ixuk winiki jelni syajtaye ja yakʼix ja Jefté yujni ja yeʼn jel lek xyaʼteltay ja sDyos, Jyoba.