¿WI KILHTAMAKU akxni wix masta mintachuwin xlakata wi tuku natlawaya chu alistalh nialh xtlawaputuna? Chuna akgspulalh uma chixku nema akxilhpat unu kdibujo, wa xlakata lu lipuwan. Uma chixku Jefté, nixapekua, xlakkaxtlawana taʼakglhuwit li Israel.

Jefté latamalh kilhtamaku akxni li Israel nialh xkakninanikgoy Jehová. Tlawamaparakgolh tuku nitlan. Wa xlakata Jehová mastay talakaskin pi li Ammón kakatlawanilh tuku nitlan. Chu akxni tasaskinikgoy Jehová wanikgoy: Nitlan tuku kkatlawanin. ¡Kakilamakgtayaw!

Kachikin nitlan limakgkatsikgoy xlakata tuku nitlan tlawakgonit. Limasiyakgolh pi nitlan makgkatsikgoy xlakata tsukuparakgolh kakninanikgoy Jehová. Wa xlakata, Jehová kamakgtayaparay.

Kachikin laksakli Jefté xlakata nakatalachipa li Ammón tiku lu lixkajnit likatsikgoy. Jefté lu lakaskin pi kamakgtayalh Jehová kguerra. Wa xlakata wani Jehová Dios: Komo wix nakimakgtayaya naktlajay uma guerra nakmaxkiyan wantiku xapulana nataxtuy kkinchik xlakata nakilakgmin akxni nakkitaspita kguerra.

Jehová kgaxmatnilh tuku wanilh chu makgtayalh natlajay guerra. Akxni Jefté taspitli, ¿katsiya wix tiku pulana lakgmilh? Wa kaj xachastum xtsumat. Jefté lu lipuwan chu wan: ¡Ni, ni, kintsumat! ¡Lu lanka talipuwan kimaxkipat! Pero akit kmaxkinit kintachuwin Jehová chu maski tuwa, kilitlawat tuku kwanininit.

Akxni xtsumat Jefté katsilh xlakata tuku xtlat xmalaknuninit Jehová, pulana lilipuwa, xlakata nakamakgxtakga xtlat chu xʼamigos. Pero putum xlatamat naskujnaniy Jehová anta kxtabernáculo kSilo (Siló). Wa xlakata xtsumat Jefté waniy: Komo wix maxkinita Jehová mintachuwin katlawa chuna la waninita.

Wa xlakata xtsumat Jefté alh kSilo, chu anta titaxtulh xlatamat, skujnanilh Jehová anta kxtabernáculo. Chu lakpuskatin xalak Israel ankgoy lakgapaxialhnankgoy akgtati kilhtamaku akgatunu kata chu akxtum tatitaxtukgoy xkilhtamakujkan. Kristianos lu paxkikgoy xtsumat Jefté, xlakata tama tsumat lu tlan skujnaniy Dios Jehová.