STORI 53
Tok Promis Bilong Jepta
OLSEM WANEM? Wanpela taim yu bin tok promis long mekim wanpela samting na bihain yu hatwok long truim tok bilong yu? Dispela samting i bin painim Jepta, olsem na em i bel hevi tru. Yu lukim em long dispela piksa? Dispela man em i wanpela strongpela jas bilong Israel.
Jepta i stap taim ol Israel i lusim pinis Jehova. Ol i mekim gen ol pasin nogut. Olsem na Jehova i larim ol Amon i givim hevi long ol. Dispela i mekim na ol Israel i krai long Jehova na tok: ‘Mipela i mekim rong long yu! Plis, helpim mipela!’
Ol Israel i sori long ol pasin nogut ol i mekim. Bilong kamapim klia olsem ol i sori long rong bilong ol, ol i kirap gen long lotuim Jehova. Olsem na Jehova i helpim ol.
Ol i makim Jepta long i go pas long pait long ol man nogut bilong Amon. Jepta i laik tru bai Jehova i helpim em long dispela pait. Olsem na em i tok promis long Jehova olsem: ‘Sapos yu helpim mi long winim ol Amon, orait namba wan man i lusim haus bilong mi na i kam bungim mi long rot taim mi go bek, bai mi givim em long yu.’
Jehova i harim tok promis bilong Jepta, na i helpim em long winim pait. Taim Jepta i go bek long haus, yu save husat i namba wan long kam bungim em long rot? Em pikinini meri bilong em, em i dispela wanpela pikinini tasol bilong Jepta. Jepta i tok: ‘Sori tumas, pikinini bilong mi! Yu givim bikpela bel hevi tru long mi. Tasol mi bin mekim tok promis pinis long Jehova, na mi no inap brukim.’
Taim pikinini meri bilong Jepta i save long dispela tok promis, pastaim em tu i bel hevi. Long wanem, em i mas lusim papa bilong em na ol pren. Na em bai i go mekim wok bilong Jehova long haus lotu bilong em long Silo inap long laip olgeta bilong em. Olsem na em i tokim papa bilong em: ‘Sapos yu bin tok promis pinis long Jehova, orait yu mas mekim olsem yu bin tok.’
Olsem na pikinini meri bilong Jepta i go long Silo, na em i mekim wok bilong Jehova inap long laip olgeta bilong em. Fopela de long olgeta yia, ol meri Israel i save go lukim em na amamas wantaim em. Ol manmeri i laikim pikinini meri bilong Jepta, long wanem, em i gutpela wokmeri bilong Jehova.
