WA TSHUKA u maha xitsumbiso, kanilezi anzhako ka xikhati zi ku karatela a ku xi tatisa? A wanuna loyi a nga laha ka mufananiso lowu i mahile zalezo, hi zona zi mu mahako a bayiseka nguvu. Yena mulamuli wo tiya-hlana wa ka Israeli a vitwako Jefta.

Jefta i hanya xikhatini lexi a vaIsraeli va nga ha khozeliko Jehova. Vona va engeta va maha zo biha. Hizalezo Jehova i tsika a vanhu va ka Amoni va va xanisa. Lezo zi rilisa vaIsraeli ka Jehova vaku: ‘Hi ku onhele. Maha wuxinji u hi ponisa.’

A vanhu va ti sola hi zilo zo biha lezi va zi mahileko. Va kombisa a kutisola loko hi ku tlhela va khozela Jehova. A ka xikhati lexi kambe Jehova wa va vuna.

Jefta i hlawuliwa hi vanhu a ku yalwa ni vabihi va ka Amoni. Jefta wa zi lava nguvu a ku vuniwa hi Jehova le kulweni. Hikwalaho yena i tsumbisa lezi ka Jehova: ‘Loku wena u nzi nyika a ku hlula vaAmoni, a munhu wo sangula wa muti wa mina a to huma a ku nzi khinga loku nzi wuya hi le kulweni nzi ta ku nyika yaloye.’

Jehova i ingisa a xitsumbiso xa Jefta, a mu vuna a ku kuma kuhlula. Laha Jefta a tlhelako kaya, wa mu tiva loyi a humako hi kusangula a mu khinga? Hi n’wana wakwe wa nhanyana, loyi a nga n’wana wakwe wa munwe. Jefta i rila aku: ‘Mayo, nwananga! Hi nga wona a hlomulo lowu u nzi nehelako. Kanilezi nzi mahile xitsumbiso ka Jehova, zonake a nzi zi koti ku tlhelela nzhako.’

Laha a n’wana wa Jefta a tivako a xitsumbiso xakwe, yenawu wa bayiseka hi kusanguleni. Hakuva lezo zi wula a ku yena i ta siya raru wakwe ni vanghana vakwe. I ta ya mbheta a masiku wontlhe ya wutomi gakwe na a tirela Jehova ka tabernakeli gakwe le Xilo. Hikwalaho i byela raru wakwe ku ngalo: ‘Loku u mahile xitsumbiso ka Jehova, u fanele ku xi tatisa.’

Hizalezo a n’wana wa Jefta i famba Xilo, a ya mbheta masiku wontlhe ya wutomi gakwe na a tirela Jehova ka tabernakeli gakwe. Mune wa masiku nzeni ka lembe ni lembe a vavasati va Israeli va famba va ya mu kamba kwaseyo, va kuma kutsaka zinwe naye ka xikhati lexo. A vanhu va mu ranza a n’wana Jefta hakuva yena i nanza ga gi nene ga Jehova.