ANA wawojo pakwete paŵatesile cilangano ni mundu jwine kaneko nikuciyiwona kuti cili cakusawusya kucikwanilisya? Mundu jwakum’wona paciwuliliju yamtendecele yeleyo, ni ligongo lyakwe akum’wona akudandawula. Munduju ali jwakwelusya jwamacili jwa Ayisalayeli lina lyakwe Yefita.

Yefita akutama mundaŵi jalesile Ayisalayeli kulambila Yehofa. Atandilesoni kutenda yakusakala. M’yoyo Yehofa akukunda kuti ŵandu ŵa ku Amoni ŵalagasyeje. Yeleyi yikwatendekasya Ayisalayeli kumlilila Yehofa kuti: ‘Twalemwecesye. Conde, atukulupusye!’

Ŵanduwo akulitendela canasa ligongo lya yindu yakusakala yatesile. Akulosya kuti akulitendela canasa mwakutandilasoni kumlambila Yehofa. Sambano Yehofa akwakamucisyasoni jemanjaji.

Ŵandu amsagwile Yefita kuti aputane ni ŵandu ŵakusakala ŵa ku Amoni. Yefita akusacilila mnope kuti Yehofa amkamucisye pangondoji. M’yoyo akusala cilangano kwa Yehofa kuti: ‘Naga akungamucisya kupunda ngondo jakulimbana ni Aamoni, mundu jwandanda jucacikopoka m’nyumba mwangu kukunjingamila pacinjiwujaga kungondoko, cinjimpeleka kwa wawojo.’

Yehofa akupikanila cilangano ca Yefita, soni akumkamucisya kupunda ngondojo. Yefita pakuwujila kunyumba kwakwe, ana akumanyilila mundu jwandanda jwakwika kukumcingamila? Ali mwanagwe jwamkongwe. Jwalakwe ali mwanace jumo pejo jwa Yefita. Yefita akulila kuti: ‘Oo, mwanangu! Mkundandawulisya. Nambo ndesile cilangano kwa Yehofa, ngusosekwa ngwanilisye.’

Mwanace jwa Yefita papikene cilangano ca babagwe cila, kundanda nombenajo akudandawula. Ligongo yeleyi yikugopolela kuti cacisosekwa kulekangana ni babagwe ni acimjakwe. Nampope cakamalile umi wakwe wosope ali mkutumicila Yehofa pa tenti jakulambilila ja ku Silo. M’yoyo akwasalila babagwe kuti: ‘Naga ŵatesile cilangano kwa Yehofa, akusosekwa acikwanilisye.’

Sambano mwanace jwamkongwejo akwawula ku Silo, soni akumalila umi wakwe wosope ali mkutumicila Yehofa pa tenti jakulambilila Mlungu. Masiku mcece mu caka cilicose acakongwe ŵa Ciyisalayeli akwawula kukumlola jwalakwe ku Siloko, ni kusangalala najo yimpepe. Ŵandu akumnonyela mwanace jwamkongwe jwa Yefita ligongo ali jwakutumicila Yehofa jwambone mnope.