¿YAAN wa baʼax ta waʼalaj a beetik, talam ta wilaj a béeykuntik? Bey úuchik tiʼ le máak ka wilik teʼ dibujoaʼ, le oʼolal jach okʼom óol. U kʼaabaʼeʼ Jefté, utúul juez tiʼ Israel maʼ saajkiʼ.

Jefteiʼ kuxlaj tu kʼiiniloʼob tsʼoʼok u pʼáatal maʼatech u adorartaʼal Jéeoba tumen le israelitaʼoboʼ. Le máakoʼobaʼ táan u kaʼa beetkoʼob baʼax kʼaas. Le beetkeʼ Jéeobaeʼ tu chaʼaj u baʼateltaʼaloʼob tumen le amonitaʼoboʼ. Le israelitaʼob túunoʼ payalchiʼinajoʼob tiʼ Jéeoba: Tsʼoʼok k-kʼebantal ta táan. ¡Áantoʼoniʼ!

Le israelitaʼoboʼ yaachaj u yóoloʼob yoʼolal le baʼaloʼob kʼaastak tsʼoʼok u beetkoʼoboʼ, ka tun káaj u kaʼa adorarkoʼob Jéeoba. Le beetkeʼ, áantaʼaboʼob tu kaʼatéen tumen Jéeoba.

Le kaajoʼ tu yéeyaj Jefté utiaʼal baʼateʼel yéetel le kʼasaʼan amonitaʼoboʼ. Jefteiʼ jach u kʼáat ka áantaʼak tumen Jéeoba teʼ baʼateloʼ. Le oʼolaleʼ, tiaʼalaj tiʼ Jéeoba: Wa ka wáantken in ganart le baʼateloʼ, yaan in kʼubiktech le máax kun yáax jóokʼol tin wotoch u kʼamen ken suunakenoʼ.

Jéeobaeʼ tu yuʼubaj le baʼax tiaʼalaj Jefteoʼ, le beetik tu yáantaj utiaʼal ku ganart le baʼateloʼ. Le ka suunaj Jefteiʼ, ¿a wojel wa máax yáax jóokʼ kʼamik? U juntúuliliʼ x-chʼupul paal. Jefteiʼ ichil u yokʼoleʼ tiaʼalaj: ¡Áay in paal, jach tsʼoʼok a beetik u yaatal in puksiʼikʼal! Baʼaleʼ teneʼ in waʼalmaj tiʼ Jéeoba yaan in kʼubik tiʼ le máax kun yáax jóokʼol kʼamkeneʼ, beooraaʼ maʼ tu páajtal u pʼáatal maʼ in beetik baʼax in waʼalmaj tiʼ.

Le ka túun tu yuʼubaj u x-chʼupul paal Jefté baʼax u yaʼalmeʼ, letiʼeʼ jach okʼom óolchaj xan, tumen yaan u pʼatik u taata yéetel le máaxoʼob jach ku biskubaʼob yéeteloʼ. Baʼaleʼ yaan u máansik u yalab u kuxtal táan u meyajtik Jéeoba tu tabernáculoi Silo. Le oʼolal tiaʼalaj tiʼ u taata: Wa teech ta waʼalaj a kʼubken tiʼ Jéeobaeʼ kʼaʼabéet a beetik.

Bey túunoʼ, u paal Jefteiʼ bin tu kaajil Silo, tiʼ tu máansaj u yalab u kuxtal táan u meyajtik Jéeoba tu tabernáculoiʼ. Tuláakal jaʼaboʼob túuneʼ, u x-chʼúupalalil u kaajil Israeleʼ ku binoʼob kaʼach u máansoʼob kampʼéel kʼiinoʼob yéetel u paal Jefté utiaʼal u líiʼsoʼob u yóol. Le máakoʼoboʼ jach u yaabiltmoʼob u paal Jefté tumen le x-lóoʼbayan chʼúupalaʼ jach u tsʼaamaj u yóol u meyajt Jéeoba Dios.