Ododo 54

Laco Matek Loyo Ducu

INGEYO nying laco matek loyo ducu ma okwo con? En obedo langolkop ma nyinge Samson. Jehovah aye miyo Samson tekone-ni. Kadi wa i kare ma pud peya kinywalo Samson, Jehovah owaco bot minne ni: ‘Cokcokki ibinywalo latin laco. En bitelo yo i laro Icrael ki i cing jo Piliciti.’

Lupiliciti gubedo jo maraco ma gikwo i lobo Kanaan. Gitye ki lumony mapol dok onongo giuno Luicrael mada. I kare mo, ka Samson onongo tye ka cito ka ma Lupiliciti gikwo iye, labwor mo madit ma tye ka mor obino me rwatte kwede. Ento Samson oneko labwor-ri ki cinge nono. En bene oneko Lupiliciti maraco mia mapol.

Lacen Samson ocako mito dako mo ma nyinge Delila. Lutela jo Pilicti ducu gucikke ni ngat acel acel ki i kin-gi bimiyo ki Delila ryal cekel 1,100 ka en otito botgi gin ma miyo Samson tek tutwal. Delila mito cente meno ducu. En pe obedo larem me ada, pa Samson nyo pa jo pa Lubanga. Pi meno en obedo ka penyo Samson teretere gin ma miyo en bedo tek tutwal-li.

Motmot, Delila oweko Samson omedo ki tucce mung me tekone-ni. En owaco ni: ‘Yer wiya pud peya kinyaro. Cakke i kare me nywala, Lubanga oyera me bedo laticce ma pire tek ma kilwongo ni Ngat Mudyere. Ka kinyaro yer wiya, ci tekona rwenyo woko.’

Tekki Delila oniang man, en oweko Samson onino i eme. Ci olwongo laco mo obino onyaro yer wiye woko. Ka Samson oco, tekone onongo dong orwenyo woko. Lupiliciti dong gubino ci gumake. Gin gukolo nyig wange aryo-ni, ci guloke odoko opiigi.

I nino mo acel Lupiliciti guyubo karama madit me woro lubangagi Dagon, ci gukelo Samson woko ki i ot mabuc me anywara. Yer wi Samson onongo olot woko doki. Samson owaco bot latin awobi ma onongo tye ka peye ni: ‘Wek kong agud wir ma ot-ti ocung i wigi-ni.’ Ci Samson olego Jehovah pi teko, ci omako wir. En odange ni: ‘Wek ato ki Lupiliciti.’ Onongo tye Lupiliciti 3,000 i karama-ni, dok ka Samson otyelle ojenge i kom wir magi, ot opoto piny ci oneko jo maraco magi ducu.

Lungolkop cura 13 nio wa i 16.