BUSHE walishiba ishina lya mwaume uwali na maka sana pano calo? Ali ni Samsone, umupingushi. Yehova e wamupeele amaka. Ilyo Samsone talafyalwa, Yehova aebele nyina ati: ‘Uli no kukwata umwana umwaume. E ukapususha abena Israele ku baPelishiti.’ AbaPelishiti bali bantu ababi abaleikala mu Kanaani. Balikwete abashilika abengi abelecusha abena Israele. Inshita imo ilyo Samsone aleya uko abaPelishiti baleikala, inkalamo iikuulu yaishile apo ali ninshi ilebuluma. Lelo Samsone aipeye ilya inkalamo ku minwe fye. Alipeye na baPelishiti abengi sana.

Pa numa, Samsone aishiletemwa umukashana, Delila. Intungulushi sha baPelishiti shalaile Delila ukuti shikamupeela indalama sha silfere 1,100 nga asheba icalelenga Samsone akwate amaka. Delila alefwaya fye indalama. Taali cibusa wa cine uwa kwa Samsone nelyo uwa bantu ba kwa Lesa. E ico aikalile fye ukwipusha Samsone icalengele akwate amaka sana.

Samsone asukile aeba Delila icalengele akwate sana amaka. Atile: ‘Nshabeyapo imishishi. Ukufuma fye pa kufyalwa kwandi, Lesa alinsalile ukuba umubomfi wakwe no kulaitwa ati umuNasiri. Nga nabeya imishishi, amaka yandi ninshi yapwa.’

Ilyo Delila aishibe icalengele, alekele Samsone alaala pa molu yakwe. Lyena aitile umwaume uwa kwisa mubeya imishishi. Ilyo Samsone abuukile, asangile amaka yonse ayo Lesa amupeele nayapwa. Balimufumishemo amenso, no kuleka aba umusha wabo.

Bushiku bumo abaPelishiti balikwete umutebeto wa kupepa lesa wabo, Dagone kabili bafumishe Samsone mu cifungo ku kumuseka. Ilyo afumine mu cifungo umushishi wakwe ninshi walikula na kabili. Samsone aebele umulumendo uwalemutungulula ati: ‘Leka njikate inceshi sha ici cikuulwa no kushintililako.’ Lyena Samsone apepele kuli Yehova ukuti amupeele amaka. Awe aikete inceshi no kupunda ati: ‘Leka mfwile pamo na baPelishiti.’ Pa mutebeto paali abaPelishiti 3,000, kabili ilyo Samsone ashintilile ku nceshi, icikuulwa caliwile no kwipaya balya ababifi bonse.