?YU YU save nem blong man ya we i strong moa i winim ol narafala man we oli laef samtaem? Man ya i wan jaj, nem blong hem Samson. Jeova nao i givim paoa long Samson. Bifo we Samson i bon, Jeova i talem long mama blong hem se: ‘I no longtaem, bambae yu bonem wan pikinini boe. Hem nao bambae i statem wok ya blong tekemaot ol man Isrel long han blong ol man Filistia.’

Ol man Filistia, oli ol man nogud we oli stap long kantri ya Kenan. Plante long olgeta, oli ol strong man blong faet, mo oli mekem i nogud long ol man Isrel. Wan taem, Samson i stap wokbaot i go long ples blong ol man Filistia, nao hem i harem wan bigfala laeon i singaot. Samson i go holem laeon ya, i terem long tu haf wetem han blong hem nomo. Mo tu, hem i kilim i ded plante handred nogud man Filistia.

Biaen, Samson i faenem wan woman, nem blong hem Delila, mo i laekem woman ya tumas. Ol lida blong Filistia oli wantem se woman ya i trikim Samson, blong hem i talemaot wanem samting we i stap mekem hem i strong tumas. Sipos Delila i faenemaot samting ya, ol lida ya wanwan bambae oli givim faef handred fifti taosen vatu long hem. Delila i wantem tumas blong kasem bigfala mane ya. Hem i no wan trufala fren blong Samson, mo i no wan trufala fren blong ol man blong God tu. Taswe hem i askem bakegen mo bakegen long Samson, wanem samting we i mekem hem i strong tumas.

Delila i askem long Samson gogo Samson i taedgud long hem, ale i talemaot wanem we i mekem hem i strong tumas. Hem i se: ‘I stat long taem we mi mi bon, be oli no katem hea blong mi samtaem. God i jusum mi blong mi stap olsem wan spesel man blong hem, wan Nasiraet. Sipos oli katem hea blong mi naoia, bambae mi no moa strong.’

Taem Delila i faenemaot samting ya, hem i mekem Samson i pilo long leg blong hem, gogo i slip ded. Nao woman ya i singaot wan man i kam, mo man ya i katem hea blong Samson. Taem Samson i wekap, hem i haremsave se hem i no moa gat paoa. Nao ol man Filistia oli kam holem hem, oli fasem hem long ol bigbigfala jen, mo oli putum hem long kalabus. Oli tekemaot tufala ae blong hem, mo oli mekem hem i kam slef blong olgeta.

Wan dei, ol man Filistia oli stap mekem wan bigfala lafet blong wosipim god blong olgeta we nem blong hem Dagon. Ale, oli tekem Samson i kam, blong oli stap mekem plei long hem, mo blong oli save laf long hem. Be taem Samson i stap long kalabus, hea blong hem i stap gru bakegen. Nao Samson i talem long boe ya we i lidim hem i go insaed se: ‘Mi wantem traem holem tu bigfala pos ya we tufala i holemtaet bigfala haos ya.’ Nao Samson i prea, i askem long Jeova blong mekem hem i strong. Nao hem i stretem han blong hem lelebet blong holem tufala pos ya we i holemtaet bigfala haos ya. Mo hem i singaot bigwan, i talem se: ‘Hae God, yu letem blong mi mi ded wetem ol man Filistia ya.’ I gat 3,000 man Filistia long lafet ya. Ale, Samson i yusum olgeta paoa ya we hem i gat, i pusumaot tufala pos ya, nao bigfala haos ya i foldaon long olgeta man nogud we oli stap insaed. Olgeta evriwan ya oli ded.

Jajes japta 13 kasem 16.