YENA unanyingika jina lia lunga mukwa tachi jinji te watwama hano hashi? Iye te mukwa kuyula, jina lienyi Samasone. Yehova mwe wahanyine tachi jacho kuli Samasone. Muze te Samasone kanda achisemuka, Yehova yamba kuli naye ngwenyi: ‘Yena mukasema umwe mwana. Iye makasongwela A-Izalele hanga akaalamwine ku moko ja A-Filistea.’

A-Filistea te atu api, ayo te katwama mu Kanana. Ayo te kakwete tujita anji, nawa te kakupinjisa chinji A-Izalele. Limwe tangwa, Samasone te kanayi kuze kwatwama A-Filistea, yalitakana ni umwe ndumba munene. Alioze Samasone yashaha ndumba wacho ni moko. Iye yashaha nawa kama ja A-Filistea api.

Kulutwe lia matangwa, Samasone yazanga umwe pwo jina lienyi te Ndelila. Miata ja A-Filistea yalakenya kuli Ndelila ngwo yetwe eswe mutukakwaha 1,100 wa mbongo ja prata nyi watulweza yize yakuhana tachi jinji kuli Samasone. Ndelila yazanga mbongo jacho jeswe. Iye te hi sepa wamwenemwene ko wa Samasone chipwe wa atu ja Zambi, ka. Kashika iye yaputuka kuhula kuli Samasone matangwa eswe ngwo, yika te yakumwaha tachi.

Hohene, Samasone yalweza kuli Ndelila chijimbikilo cha tachi jenyi. Iye yamba ngwenyi, ‘Kambu jami kanda achijiteta. Chize muze nasemukine, Zambi yangusakula hanga ngupwe umwe kavumbi kenyi mupema yoze anavuluka ngwo Kanazireu. Nyi kambu jami ajiteta, Yami chichi kupwa nawa ni tachi.’

Muze Ndelila hachinyingika yapombesa Samasone mu kondo yenyi, hi iye yaya mu tulo. Iye yasanyika umwe lunga hanga eze atete kambu jenyi. Muze Samasone hahinduka, te tachi keshi najo nawa. Mba A-Filistea yeza yamukwata. Ayo yatuwa meso jenyi, nawa yamutenga kapinji ko.

Limwe tangwa A-Filistea yalikungulula hanga alinge chimwe chiwanyino chinene cha kuwayila zambi yo Ndagone, yaya nikusaka Samasone mu zuwo lia ususu hanga amuhehese. Kumana te kambu ja Samasone hijasoka nawa cheka. Samasone yamba kuli kanuke yoze te unamusongwela ngwenyi: ‘Ngutwale ku manguji waze anakolesa zuwo.’ Hazehene, Samasone yalemba kuli Yehova hanga amwehe tachi, hi yakwata ku manguji aali. Iye yakololoka ngwenyi: ‘Ngweche ngufwe hamwe ni A-Filistea.’ Ha chiwanyino chacho te hali 3,000 a A-Filistea, mba muze Samasone hapuzula manguji, zuwo yilipuzuka, nawa yilishaha atu api eswe waze anakapwamo.