VAWLEI cung minung lak i a ṭhawng bik mi pa a min cu nan hngal maw? Amah cu Samson an ti mi biaceihtu pakhat a si. Samson ṭhawnnak a petu cu Jehovah a si. Samson a chuah hlanpi in Jehovah nih a nu kha hitin a chimh: ‘Nangmah cu a rauh hlan ah fapa na hrin lai. Cun amah nih Israel mi cu Filistin mi hna kut chung in khamhnak ah hruaitu a si lai.’

Filistin mi hna cu Kanaan ram chung i a um mi miṭhalo an si. An nih cu ralkap tampi an ngei i, Israel mi hna kha harnak tampi an pek hna. Nikhat cu Samson cu Filistin mi hna umnak lei a kal lio ah lam ah, chindeih nganpi pakhat a sin ah huk pah in a ra. Sihmanhsehlaw Samson nih a kut lawng bak in chindeihpi cu a rak thah. A ṭha lo mi Filistin mi zong kha za tampi a thah ve hna.

A hnu ah Samson cu Delilah an ti mi nu pakhat kha a rak duh. Filistin mi hrawi tu hna nih Delilah cu Samson hi zeinihdah a ṭhawnter ti na kan chimh khawh ahcun pa khat cio in ngun tangka 1,100 kan in pek lai tiah bia an kam. Delilah nih cuzat tangka pi cu a rak duh tuk. Amah cu Samson a hawikom ṭha le pathian miphun hna hawikom ṭha a rak si lo. Cucaah Samson kha zeicahdah mah tluk hin na ṭhawn tiah a hal chih.

A donghnak ah Samson nih a ṭhawnnak kong biathli kha a chimh. ‘Ka sam hi voikhat hmanh kaa met rih lo. Ka chuah cangka in Pathian nih Nazir ti mi a sal caah a ka thim. Ka sam hi meh dih si seh law ka ṭhawnnak cu ka sung ko lai,’ tiah a chimh.

Delilah nih mah kong a theih cun Samson kha a phei cung ah a ih ter. Cun mipa pakhat a auh i a sam cu a mehter. Samson aa hlauh tik ahcun a ṭhawnnak vialte cu a lo dih cang. Cutikah Filistin mi cu an ra lut i an tlaih. A mit pahnih in an khoih i ansal ah an ser.

Nikhat cu Filistin mi hna cu an pathian Dagon biak awk ah puai nganpi pakhat an ngei i, Samson kha thong chung in capo kan serpiak seh tiah an va chuah. Mah lio ahcun Samson a sam cu a sau ṭhan cang. Samson nih a kut a hruaitu ngakchiapa cu: ‘Hi inn a dohtu tung kha ka tonghter tuah hna,’ tiah a ti. Cuhnu ah Samson nih Jehovah sin ah thla a cam i ṭhawnnak a hal i, tung cu a tlaih hna. Amah nih: ‘Filistin mi hna he ka thihter ko,’ tiah a au. Cu puai chung ah cun Filistin mi 3,000 an um i Samson cu a kun i, tung hna kha a koih tik ah innpi cu a tlu i cu chung i a um mi miṭhalo vialte cu a thah dih hna.