ATRE fe hi nyipunie la ëjen la atr ka tru trenge catr hune la nöjei atr ka mele qaane ekö? Samasona, ketre atre amekötin. Hna hamën koi angeic la trenge catr hnei Iehova. Qëmeken troa mala Samasona, hnei Iehova hna qaja kowe la thine i angeic ka hape: ‘Tro eö a hnahon elany la ketre nekönatr trahmany. Tro angeic a tro xomi Isaraela me amele angatr qa ngöne la ihnatrapaime ne la itretre Filisiti.’

Ka jilapa la itretre Filisiti e Kanana, nge ngazo catr la thiina i angatr. Ala nyimu catr la itre sooce i angatr, nge thaa mano kö angatr akötrën la itretre Isaraela. Ame ngöne la Samasona a tro ngöne la ketre ijin kowe la götrane zi ne la itretre Filisiti, kola tro me ho koi angeic la ketre liona. Ame hnei Samasona hna humuthe ju la liona hnene hi la lue iwanakoime i angeic. Hnei angeice mina fe hna humuth la itretre Filisiti, traqa kowe la itre hadredre la etrun la itre atr ka iangazo, itre ka kuca la thiina ka menu.

Ame hë thupene lai, Samasona a piin me hnim la ketre föe, Delila la ëjen. Ame hnene la itre tane i angetre Filisiti hna ce axeciën troa hamën la isa 1 100 lao dralë koi Delila, e tro nyidro a qaja la qaan la trenge catre i Samasona. Ka tru hë koi Delila la pi aja mani. Tëtë hi la hnimi nyidro koi Samasona, memine la nöje i Akötresie. Celë hi matre ngöne la nöjei drai, nyidro a pi hune fë matre tro Samasona a qaja amaman la qaan la trenge catre i angeic.

Ame hë la pun, Samasona pë hë a qaja qaja jë koi Delila la qaan la trenge catre i angeic. Öni angeic ka hape: ‘Thaa hna hane kö xöje la iheng. Qaane ekö lo kola hnaho ni, Akötresieti a ië ni jë matre tro ni a Nazeri, ketre pengöne aqane nyihlue i Nyidrë. Maine troa xöje la iheng, tro ha paatr la trenge catreng.’

Ame la kola ase dreng hnei Delila la ewekë celë, nyidroti hi lai a ameköle Samasona ju hune la lue watingöne ca i nyidro. Ame hnei angeic hna hën la ketre atr troa xöj la ihe i Samasona. Matre ame hë la kola hlë hnei Samasona, paatre hë la trenge catre thei nyidrë. Ame hna traqa hnei angetre Filisiti me xölehuji nyidrë. Angatr a sea trije ju la lue alameke i nyidrë, matre nyine tro pë hë angatr a thahluen enehila.

Ame ngöne la ketre drai, hnene la itretre Filisiti hna ce madrine matre troa atrun la haze i angatr, ene Dagona; haawe, hnei angatr hna xomi Samasona qaa kalabus matre troa ahleuhleunyi angeic qëmekene la nöjei atr. Ame la ijine cili, nango cia hmaca ha la ihe i Samasona. Öni Samasona jë hi kowe la nekönatr ka eatrongë angeic ka hape: ‘E ni jë kowe la itre ikapa ne la iuma matre tro ni a ketr itre ej.’ Thupene lai, Samasona a ea ju la lue ikapa ne la uma me thithi koi Iehova troa sipo Nyidrë la trengecatr. Nyidrë a suene jë draië me hape: ‘Epi ce meci ni memine la itretre Filisiti.’ Ala nyimu catr la angetre Filisiti ngöne lai hna kuci madrin, ala 3 000 angatr; ame hnei Samasona hna pen akein la lue ikapa ne la iuma, ene pe trotro lapa pi ej, a malatran me humuth asë lai itre atr ka ngazo.