Omurumendu omunamasa tjinene
EHUNGI 54
Omurumendu omunamasa tjinene
ENA romurumendu omunamasa tjinene ngwa hupire mo ri tjiwa? Eye omupangure wena Simson. Simson omasa we wa perwe i Jehova. Ngunda Simson ee hi ya kwatwa, Jehova wa raera ina yaSimson a tja: ‘Nambano ove mo panduka omuatje omuzandu. Eye ma hongorere po Ovaisrael mokuveyama kOvafilisti.’
Ovafilisti va ri ovandu ovarunde mba turire mu Kanaan. Owo va ri novarumendu ovarwe ovengi, nowo tjiri aave tatumisa Ovaisrael. Otjikando tjimwe, Simson tja ri mondjira okuyenda ingwi ku kwa tura Ovafilisti, ongeyama onene ye ya ku ye amai mu posire ovimboro. Nungwari Simson wa zepa ongeyama ndji nomake we omuini. Eye wina wa zepa omasere yOvafilisti ovarunde.
Kombunda Simson wa suverere omukazendu wena Delila. Ovanane wOvafilisti va kwizikira Delila kutja auhe wawo me mu pe otupa twovisilveri 1 100, indu eye tje ve raere kutja Simson omasa we u isa pi. Delila aa vanga ovimariva avihe mbyo. Eye kena pa ri epanga ratjiri raSimson poo rovandu vaMukuru. Okutja eye o tjaa pura Simson kutja otjikeṋa tji tji mu pa omasa tjinene nao.
Korusenina, Delila wa tjita kutja Simson me mu raere otjiundikwa tjomasa we. Eye we mu raera natja: ‘Ozondjise zandje kaze na indu za konderwe. Okuza koruveze rongwatero yandje, Mukuru we ndji toorora kutja mbi rire omukarere we wapeke, ngu isanewa Omunasirei. Indu tji mba kondwa ozondjise zandje, omasa wandje maye piti.’
Nu Delila tja tjiwa otjiṋa hi, eye wa zezengera Simson pomatumbo we nga tja rara. Okuzambo wa isana omurumendu me ye okukonda ozondjise ze. Indu Simson tja penduka, eye kari nomasa rukwao. Okuzambo Ovafilisti va hita nave mu kambura. Owo ve mu homona omeho we ayeevari, nave mu isapo omukarere wawo.
Eyuva rimwe Ovafilisti va ri nomukandi omunene wokurikotamena ku mukuru wawo Dagon, nowo va pitisa Simson okuza mondeko okuyekumunyekerera. Momakaendero woruveze ozondjise za Simson za uta okuhapa rukwao. Simson wa raera kokazandona kaake mu nana korupangu a tja: ‘Ndji esa mbi ṋuṋunge ozongunḓe ku kwa kuramena ondjuwo.’ Okuzambo Simson wa kumba ku Jehova me mu pe omasa, tjazumbo a handa ozongunḓe. Neye wa ravaera nai: ‘Ndji esa mbi koke puna ovafilisti.’ Opo pa ri Ovafilisti 3 000 pomukandi imbwi. Nu Simson tja ṱaṱera kozongunḓe inḓa ondjuwo ya wira pehi nu ya zepa ovandu avehe ovarunde mbo.
