AMMOM kadi ti nagan ti kapipigsaan a lalaki a nagbiagen? Isu ti ukom nga agnagan Samson. Ni Jehova ti nangted ti pigsa ni Samson. Sakbay a naiyanak ni Samson, imbaga ni Jehova iti inana: ‘Ti anakmo idaulonanto ti panangisalakan iti Israel kadagiti Filisteo.’

Dagiti Filisteo ket dakesda a tattao nga aggigian idiay Canaan. Talaga a nauyongda kadagiti Israelitas. Naminsan, idi agturturong ni Samson kadagiti Filisteo, nakapatay ti dakkel a leon babaen kadagiti imana laeng. Isu met ti nakapapatay ti ginasgasut kadagiti dakes a Filisteo.

Idi agangay nagayat ni Samson iti maysa a babai nga agnagan Dalila. Inkari dagiti lider dagiti Filisteo nga ikkanda ni Dalila iti sag-1,100 a kapisi ti pirak no ibagana kadakuada no apay nagpigsa ni Samson. Gapuna kanayon a salsaludsoden ni Dalila ken Samson no apay isut’ nakapigpigsa.

Iti kamaudiananna, imbaga ni Samson ken Dalila: ‘Ti buokko saan pay a naputputdan. Manipud maipasngayak, siak ti pinili ti Dios nga agbalin a naisangsangayan nga adipenna a maaw-awagan Nazareo. No maputdan ti buokko, mapukawko ti pigsak.’

Ket, ni Dalila pinaturogna ni Samson iti saklotna. Kalpasanna immawag ti lalaki a sumrek ket pinutdanna ti buokna. Idi makariingen ni Samson, napukawnan ti pigsana. Isut’ tiniliw dagiti Filisteo ket pinagbalinda nga adipenda. Binulsekda ti dua a matana.

Maysa nga aldaw, nagaramid dagiti Filisteo ti dakkel a rambak a pangdaydayaw ti Diosda a ni Dagon, ket inruarda ni Samson manipud pagbaludan tapno pagkatkatawaan. Ngem timmubo manen ti buok ni Samson. Indawatna nga isut’ maiturong idiay dua nga adigi a mangtengtengngel ti balay. Ket nagkararag ken Jehova a maipaay iti pigsa ket sana impukkaw: ‘Bay-annak a matay agraman dagiti Filisteo.’ Induron ni Samson dagiti adigi, ket narba ti balay kadagiti isuamin a 3,000 a Filisteo nga adda iti rambak, a nangpapatay amin kadagiti dakes a tao.