LAJ Sanson jwal kaw xmetzʼew chiru yalaq ani ut kiwank choʼq aj raqol aatin. Ma nakaanaw ani kikʼehok re xmetzʼew? Aʼan li Jehobʼa. Maajiʼ ajwiʼ nayoʼlaak laj Sanson naq li Jehobʼa kixye re li xnaʼ: ‹Chi seebʼ twanq jun aakʼuulaʼal. Aʼan tkʼamoq bʼe ut tixkolebʼ laj Israel saʼ ruqʼebʼ laj Filisteo›.

Ebʼ laj Filisteo maaʼusebʼ xnaʼlebʼ ut nekeʼxrahobʼtesi ebʼ laj Israel. Saʼ jun kutan naq laj Sanson yook chi xik Canaan bʼarwiʼ wankebʼ chaq laj Filisteo kixtaw jun nimla kaqkoj. Laj Sanson kixkamsi li kaqkoj rikʼin ruqʼ ut kixkamsi naabʼalebʼ aj Filisteo.

Chirix chik aʼan laj Sanson xko xchʼool chirix jun li ixq, xDalila xkʼabʼaʼ. Ebʼ li keʼjolomink rehebʼ laj Filisteo keʼraj xnawbʼal bʼar nachalk xmetzʼew laj Sanson. Joʼkan naq keʼxye re xDalila naq teʼxkʼe re 1.100 ru li plaat chixjunqalebʼ wiʼ tixye rehebʼ kʼaʼut naq wank xmetzʼew laj Sanson. Li xDalila kisahoʼk xchʼool naq kirabʼi xkʼihal li tumin. Joʼkan naq moko kixkanabʼ ta xpatzʼbʼal re laj Sanson bʼar nachalk xmetzʼew. Li xDalila moko tzʼaqal ramiiw ta laj Sanson, chi moko wank ta choʼq ramiiw li xtenamit li Yos.

Li xDalila kixnaw bʼar nachalk xmetzʼew laj Sanson xbʼaan naq laj Sanson kixye re: ‹Maajunwa keʼxbʼes li wismal. Naq xinyoʼlaak li Yos kixsikʼ wu re naq tinkʼanjelaq chiru choʼq aj Nazareo. Joʼkan naq wi teʼxbʼes li wismal tsachq linmetzʼew›.

Naq xDalila kirabʼi aʼin, kixwartesi laj Sanson chiru li raʼ ut kiroksi jun li winq saʼ rochoch re naq tixbʼes li rismal. Naq kiʼajk ru laj Sanson maakʼaʼ chik xmetzʼew. Tojaʼ naq ebʼ laj Filisteo keʼxchap laj Sanson, keʼrisi saʼ li ru ut keʼxkʼe choʼq xmoosebʼ.

Ebʼ laj Filisteo keʼxbʼaanu jun li ninqʼe re xloqʼoninkil li xyosebʼ Dagon. Tojaʼ naq keʼrisi chaq laj Sanson saʼ tzʼalam ut keʼok xseʼenkil. Abʼan laj Sanson ak xchamoʼk wiʼ chik li rismal. Laj Sanson kixye re li chʼinaʼal li yook chi kʼamok re: ‹Kʼehin chi xchʼeebʼal roqechal li ochoch›. Chirix chik aʼan laj Sanson kixpatzʼ xmetzʼew re li Jehobʼa. Tojaʼ naq kixchap roqechal li ochoch. Kixjap re ut kixye: ‹Kanabʼin chi kamk rikʼinebʼ laj Filisteo!› Saʼ li ninqʼe wankebʼ 3.000 aj Filisteo. Naq laj Sanson kixkʼe xmetzʼew, kitʼaneʼk li ochoch ut chixjunilebʼ keʼkamk.