Icisimicisyo 54: Umwalalume Uukwatisye Amakosa
KANI ulilisi isina lya mwalalume uwakwatisye amakosa ukucila bonse? Musololwesi uwe sina lya Samisoni. Ni baYehoba e bamupela amakosa Samisoni. Ili Samisoni tangafyalwa, baYehoba babula banyina ati: ‘Bukumo ukakwata umwana. Akalukutangilila mu kupulusya Isilaeli ku baFilisiti.’
AbaFilisiti bantu ababipile abekala mu Kanani. Balikwete abalalume ba nkondo abengi, kabili balasomesya abaIsilaeli ukwakuti. Pa mpindi imo, ili Samisoni alukuya ukwikala abaFilisiti, inkalamu ikulu ilukwisa mu kumucinsya ili imubulumina. Pano Samisoni aipaya inkalamu ne maboko lukoso. Nakabili aipaye’myanda ya baFilisiti imbifi.
Mukukonkapo Samisoni atemwa umwanakasi uwe sina lya Delila. Intangisi sya baFilisiti syalaya ati umo umo akapela Delila 1,100 isye silifa kani ababula icimulenga Samisoni ukukwatisya amakosa. Delila alukusifwaisya syonse’syo indalama. Talipo ni cibusa wa cinenene uwakwe Samisoni, neli uwa bantu ba baLesa. Popele atwalilila ukulukwipusya Samisoni icimulenga ukukwatisya amakosa.
Mukupelako, Delila amulenga Samisoni ukumubula imfiso ya makosa akwe. Alabila ati: ‘Imisisi syanji tasingabeyewapo. Ukufuma impindi ili nafyelwe, baLesa baalinsalulwile ukuba umupyungisi wabo uulibelele uwitwa ati umuNasali. Kani bambeye’misisi, amakosa anji angafumamo muli nebo.’
Ili Delila aumfwe’ci, alalika Samisoni pa fibelo fyakwe. Eli aita umwalalume ukwisa mu kubeya imisisi yakwe. Ili Samisoni abuka, takwetepo amakosa. Eli abaFilisiti baisa ne kumwikata. Bamulobolamo ne menso, ne kumucita umusya wabo.
Kambi kasuba abaFilisiti bakwato’kusefya ukukulu ukwakutembela lesa wabo Dagoni, kabili bafumya na Samisoni mwi kati ati bamuseke. Pali iyi mpindi, imisisi yakwe Samisoni yakula nakabili. Samisoni abula umusankwa uulukumutangilila pa kuboko ati: ‘Unenge ati njikate impanda isikete iŋanda.’ Eli Samisoni atembela kuli baYehoba ukumupela amakosa, kabili aikata ne mpanda. Abilikisya ati: ‘Ngamfwile pamo ne baFilisiti.’ Kuli abaFilisiti 3,000 mu kusefya, kabili ili Samisoni aeyaminako ku mpanda iŋanda yawa pansi ne kwipaya syonse’si mbifi.
Abasololwesi ifyapitala 13 ukufika ku 16.
Ifyakwipusya
- Kani umwalalume uwakwatisye amakosa ukucila bonse aali ninani isina, kabili ninani uwamupele amakosa?
- Imo impindi, kani nifindo Samisoni acita ku nkalamu iikulu, koti nifyefyo ulukubona mu cikope?
- Mba nifindo ifya mfiso ifi Samisoni alukubula Delila palya pa cikope, kabili fyatungulula syani ku kumwikata ku baFilisiti?
- Kani Samisoni alicitile’ndo pakweba’ti epaye abapate bakwe 3,000 abaFilisiti pa busiku ubu afwile?
Ifyakwipusya na fimbi
- Pendeni Abasololwesi 13:1-14.
Kani Manoa ne mukasi wakwe balapela syani icakubwenako iciweme ku bafyasi pa fyakukusya abana? (Sol. 13:8; Amasa. 127:3; Efes. 6:4)
- Pendeni Abasololwesi 14:5-9 na 15:9-16.
Mba icisimicisyo cakwe Samisoni pafi aipeye inkalamu, ukuputala imyando iya bukumo iibamukakile, ne kupyungisya umucendwa wa mbongolo ukwipaya abalalume 1,000 lilafisulule’ndo pafi umupasi wa baYehoba uswetelele upyunga?
Umupasi uswetelele ulatofwa syani muli bulelo? (Sol. 14:6; 15:14; Saka. 4:6; Cit. 4:31)
- Pendeni Abasololwesi 16:18-31.
Kani ukwambala ne babipile kwalicitile’ndo kuli Samisoni, kabili nifindo tungasambililako kuli cici? (Sol. 16:18, 19; 1 Kol. 15:33)
