ຊາຍທີ່ແຂງແຮງທີ່ສຸດ
ບົດ 54
ຊາຍທີ່ແຂງແຮງທີ່ສຸດ
ເຈົ້າຮູ້ຈັກຊື່ຊາຍທີ່ແຂງແຮງທີ່ສຸດຜູ້ເຄີຍມີຊີວິດຢູ່ບໍ? ເຂົາເປັນຜູ້ຕັດສິນຄົນນຶ່ງຊື່ຊາມຊອນ. ພະເຢໂຫວາເປັນຜູ້ໃຫ້ຊາມຊອນມີກຳລັງ. ແມ່ນແຕ່ກ່ອນທີ່ຊາມຊອນເກີດມາ ພະເຢໂຫວາບອກແມ່ຂອງເຂົາວ່າ: ‘ໃນບໍ່ຊ້າເຈົ້າຈະມີລູກຊາຍຄົນນຶ່ງ. ເຂົາຈະເປັນຜູ້ນຳຊົນຍິດສະລາເອນໃຫ້ພົ້ນຈາກຊາດຟີລີດຕີນ.’
ຊົນຟີລີດຕີນເປັນຄົນຊົ່ວຜູ້ຊຶ່ງຢູ່ໃນການາອານ. ເຂົາມີພົນສູ້ຮົບຈຳນວນຫຼາຍ ແລະເຂົາເຮັດອັນຕະລາຍແກ່ຊົນຍິດສະລາເອນແທ້ໆ. ຄັ້ງນຶ່ງ ເມື່ອຊາມຊອນພວມເດີນທາງຈະໄປບ່ອນຊຶ່ງຊົນຟີລີດຕີນຢູ່ນັ້ນ ມີສິງໃຫຍ່ຕົວນຶ່ງທີ່ຮ້ອງແຜດສຽງກົງມາຫາເຂົາ. ແຕ່ຊາມຊອນຂ້າສິງດ້ວຍມືເປົ່າທໍ່ນັ້ນ. ເຂົາຂ້າພວກຟີລີດຕີນທີ່ຊົ່ວຫຼາຍຮ້ອຍຄົນດ້ວຍ.
ຕໍ່ມາຊາມຊອນຫຼົງຮັກຍິງຄົນນຶ່ງຊື່ເດລີລາ. ຜູ້ນຳຟີລີດຕີນສັນຍາວ່າແຕ່ລະຄົນຈະໃຫ້ເງິນແກ່ເດລີລາ 1,100 ແຜ່ນຖ້ານາງຈະບອກເຂົາໄດ້ວ່າ ແມ່ນຫຍັງເຮັດໃຫ້ຊາມຊອນແຂງແຮງຢ່າງນັ້ນ. ເດລີລາຕ້ອງການເງິນທັງໝົດນັ້ນ. ນາງບໍ່ແມ່ນເພື່ອນແທ້ຂອງຊາມຊອນ ຫຼືແຫ່ງຜູ້ຄົນຂອງພະເຈົ້າ. ດັ່ງນັ້ນນາງຈຶ່ງຖາມຊາມຊອນບໍ່ຢຸດເຖິງວ່າແມ່ນຫຍັງທີ່ເຮັດໃຫ້ຊາມຊອນແຂງແຮງເຊັ່ນນັ້ນ.
ໃນທີ່ສຸດ ເດລີລາສາມາດເຮັດໃຫ້ຊາມຊອນບອກຄວາມລັບກ່ຽວກັບກຳລັງຂອງເຂົາ. ເຂົາບອກວ່າ: ‘ຜົມຂອງຂ້ອຍບໍ່ເຄີຍຖືກຕັດຕັ້ງແຕ່ເວລາເກີດມາ ພະເຈົ້າເລືອກຂ້ອຍເປັນຜູ້ຮັບໃຊ້ພິເສດຄົນນຶ່ງຂອງພະອົງທີ່ເອີ້ນວ່ານາຊາເລເອນ. ຖ້າຕັດຜົມຂອງຂ້ອຍ ຂ້ອຍຈະໝົດກຳລັງ.’
ເມື່ອເດລີລາຮູ້ເລື່ອງນີ້ນາງຈຶ່ງໃຫ້ຊາມຊອນນອນຫຼັບເທິງຕັກຂອງນາງ. ແລ້ວນາງເອີ້ນຊາຍຄົນນຶ່ງເຂົ້າມາໃຫ້ຕັດຜົມຂອງເຂົາ ຄັນຊາມຊອນຕື່ນຂຶ້ນກຳລັງຂອງເຂົາກໍ່ເສື່ອມໄປໝົດ. ຊົນຟີລີດຕີນຈຶ່ງເຂົ້າມາແລະຈັບເອົາຕົວໄປ. ເຂົາຄວັດຕາທັງສອງຂ້າງອອກ ແລະເຮັດໃຫ້ຊາມຊອນເປັນທາດຂອງພວກເຂົາ.
ມື້ນຶ່ງ ຊົນຟີລີດຕີນມີການກິນລ້ຽງໃຫຍ່ເພື່ອນະມັດສະການພະດາຄອນຂອງເຂົາ ແລະເຂົານຳເອົາຊາມຊອນອອກມາຈາກຄຸກເພື່ອເອົາມາຫຼິ້ນເປັນຕົວຕະຫຼົກ. ໃນລະຫວ່າງນັ້ນ ຜົມຂອງຊາມຊອນໄດ້ງອກຂຶ້ນອີກ. ຊາມຊອນບອກເດັກນ້ອຍຜູ້ຊາຍທີ່ຈູງມືຕົນວ່າ: ‘ຂໍໃຫ້ຂ້ອຍຈັບເສົາທີ່ຄ້ຳຕຶກເຖີດ.’ ຄັນແລ້ວຊາມຊອນກໍ່ອະທິດຖານພະເຢໂຫວາຂໍກຳລັງ ແລະເອົາມືຍຶດເສົາທັງສອງໄວ້. ເຂົາຮ້ອງວ່າ: ‘ຂໍໃຫ້ຂ້າພະເຈົ້າຕາຍກັບຄົນຟີລີດຕີນເຖີດ.’ ໃນງານກິນລ້ຽງນັ້ນມີຊາວຟີລີດຕີນ 3,000 ຄົນ ແລະຂະນະທີ່ຊາມຊອນກົ້ມຕົວລົງຊຸກເສົາເຕັມແຮງຕຶກນັ້ນກໍ່ພັງທະລາຍລົງແລະຂ້າຄົນຊົ່ວເຫຼົ່ານີ້ທັງໝົດ.
ພວກຜູ້ຕັດສີນ ບົດ 13 ເຖິງ 16.
