Chihande 54

Lunga Wakutakama

WEJIVA lijina lyamutu apwile wakutakama chikuma hano hamavu tahi? Ikiye muka-kuyula, Samasone. Yehova ikiye namuhane Samasone jingolo. Shimbu kanda Samasone asemuke, Yehova mwalweza naye ngwenyi: ‘Kalinwomu useme mwana walunga. Mwakalwila vaIsalele kuli vaFwilishite.’

VaFwilishite hivatu vavapi vamuKanane. Vali navatu vaka-kwasa jita vavavulu nakuyanjisa chikuma vaIsalele. Lwola lumwe, Samasone hakuya kuchihela chavaFwilishite, ndumba wamunene hikwiza amulye. Oloze Samasone kukwata ndumba jiheyo namavoko kaha. Himwajiha makulukaji avaFwilishite vavapi.

Kutwala muze Samasone hikuzanga mwanapwevo walijina lyaNdelila. Vamyata javaFwilishite vosena hinavalishika lushiko ngwavo mutu himutu mwakahana Ndelila jimbongo japalata 1,100 nge mwavalweza hafuma ngolo jaSamasone. Ndelila mali osenawa nawasake. Keshi hisepa lyaSamasone, chipwe lyavatu jaKalunga chikupuko. Ngocho hikumwihwojola Samasone hafuma ngolo jenyi.

Woho, Ndelila nalembejeka lyehi Samasone amulweze kafuta kajingolo jenyi. Samasone ngwenyi: ‘Jikambu jami kanda vajiteuleho lyehi. Kufuma hakusemuka chami, Kalunga angusakula kupwa ngamba yenyi wakulipwila nakunguvuluka kaNajili. Nge kambu jami teule, kahami ngolo pimbi.’

Chamwaza, omu nevuko Ndelila, hikumusavalika tulo hamahinji enyi. Jino mwasanyika mutu kwiza nakuteula jikambu jenyi. Samasone hakuhinduka, ngolo jino pimbi. VaFwilishite hikwingila nakumukwata. Kukwata meso enyi povi, nakumutenga ndungo yavo.

Likumbi limwe vaFwilishite vali nachiwanyino chakulemesa kalunga kavo Ndangone, kaha navalovola Samasone mukamenga vamusekeleke. Halwola kana, jikambu jaSamasone jinakolo lyehi. Samasone mwamba kuli mukweze namukwate kulivoko ngwenyi: ‘Ngweche ngukwate kujipanda jakwata zuvo.’ Jino Samasone himwalomba Yehova amuhane jingolo, nakukwata kujipanda. Hikuvilika ngwenyi: ‘Ngufwenga navaFwilishite hamwe.’ Kuchiwanyino kuli vaFwilishite 3,000, kaha Samasone hakushinjika jipanda, zuvo hikushiuka nakujiha vatu kanava vavapi.

Vaka-kuyula tupetulu 13 swi naku 16.