¿O TBʼIYE tiʼ tbʼi xjal aju nimxix tipumal o tzʼanqʼin twitz txʼotxʼ? Sansónteq tbʼi xjal lu ex jun jwestoq. A Jehová tzaj qʼonte tipomal. Atxix tej naʼmxteq titzʼje, tzaj tqʼamaʼn Jehová te tnan kyjalu: ‹Aju tala tzul itzʼj, kbʼel nej kywitz aj Israel tuʼn kykambʼan kyiʼj aj Filisteo›.

Mya bʼaʼn xjalqetoq aj Filisteo aʼyejo in che anqʼintaq toj txʼotxʼ Canaán. At nim kysoldad ex nok kybʼinche nya bʼaʼn kyiʼj aj Israel. Jun maj tej t-xi Sansón jatumel nchi anqʼin aj Filisteo etz lipen jun bʼalun (león) tiʼj, aju in tzanunteq wen. Naq tukʼe tqʼobʼ Sansón kubʼ tbʼiyoʼn bʼalen lu. Ax ikx e kubʼ tbʼiyoʼn nim aj Filisteo.

Yajxetl, tbʼanel ela jun xuʼj toj twitz Sansón ajo Dalila tbʼi. Aʼye nejenel kye aj Filisteo xi kymaʼn te Dalila qa teyele junjun kye kxel kyqʼoʼn 1.100 saq pwaq te, oʼkx qa ma txi tqʼamaʼn tiquʼn at nim tipun Sansón. Tajtoq Dalila aju pwaq. Nya tbʼaniltoq tamiw Sansón te, nix te ttnam Dios. Tuntzun jlu, kukx xi tqanin te Sansón tiquʼn at nim tipumal.

Etzx toj ttziʼ Sansón tuʼn Dalila jatumel ntzajetaq tipumal. ‹Mi jun maj o tzʼel matzoʼn (jon) ttxaʼn nwiʼye, quʼn atxix tej wul itzʼjiye paʼmaj qine tuʼn Dios tuʼn wajbʼene te, moqa tuʼn woke te nazareo. Qa ma tzʼel matzoʼn ttxaʼn nwiʼye, kʼelel wipune›. Chi Sansón.

Kubʼ twatzaʼn Dalila Sansón twiʼ tqan tej tok tbʼiʼn jlu. Okxtzun tiʼn jun xjal tuʼn tel tiʼn tiʼj twiʼ Sansón. Tej tel twatl Sansón, ya mitiʼteqtl tipumal. E okxtzen aj Filisteo ex tzyet kyuʼn. Etz kyiʼn twitz ex ok kyqʼoʼn te kymajen.

Jun maj in che ninqʼijentaq aj Filisteo twitz kydios aju Dagón tbʼi, etztzun kyiʼn Sansón tuʼn kyok ten xmayel tiʼj. Otaq chʼiytl twiʼ Sansón. Xi tqʼamaʼn Sansón te kʼwaʼl aju qʼil te: ‹Chin twabʼankuya jatumel bʼaʼn tuʼn kyok nmakoʼne qe tqan ja›. Xitzun tqanin Sansón tipun te Jehová ex i ok ttzyuʼn qeju tqan ja. Jawtzen ẍchʼin ex tqʼama tuʼn ‹tkyim junx kyukʼe aj Filisteo›. Attoq 3.000 aj Filisteo tuj ninqʼij, tejtzun kyok ttzyuʼn Sansón tqan ja, kubʼ xitj ja ex e kyim kykyaqil qeju mya bʼaʼn xjal lu.