UA TANTEKEYA iya yala ua kele na ngolo ku tuvakana vantu vose ha mavu? Ua puile umo ngazi ua lizina lia Samusoni. Yehova ikeye ua mu hele ngolo. Samusoni tele kanda a semuke, Yehova ua lekele ise ngueni: ‘U ka sema muana. Ikeye a ka tuamenena vaIsaleli mu ku luisa vaFilisteo.’

VaFilisteo vapua vantu va ku pihia va tunga mu Kanana. Va kala na masualale va vengi kaha ve ku yandesa vaIsaleli. Tangua limo, Samusoni tele a li na ku ya kuimbo lia vaFilisteo, ua litulukuile na ndumba ua kama a li na kuiza oku ohia. Vunoni Samusoni ua tsihile ndumba na mavoko lika. Kaha ua ka tsiha naua vihita via vaFilisteo vakua vupi.

Kaha Samusoni ua lemene umo mpuevo lizina lieni Ndelila. Vantuamena va vaFilisteo va kulahesa Ndelila nguavo, va ka mu hana  muntu ku muntu zimbongo zia ku pua 1.100 zia palata, nga a va leka haka ya kala ngolo ya Samusoni. Ndelila ua tondele ku tambula zize zimbongo ziose. Muomu ka lemene Samusoni na mutima ueni uose, cipue vantu va Njambi ka va lemene. Ngeci ntsimbu yose ua sindiyile Samusoni linga a mu leke haka ya kala ngolo yeni.

Amba vuose Ndelila ua hasele ku lingisa Samusoni a mu leke lihungu lia ngolo yeni. Kaha Samusoni ngueni: ‘Kanda va ci tehule vinkambu viange, fume ha ku semuka cange, Njambi ua nji hanguila ku pua ngamba yeni ua ku lifuila u va luka nguavo kaNazileu. Nga va tehula vinkambu viange kaha ngolo i nji fuma’.

Mua vuile ngoco, Ndelila ua lingisile Samusoni ku ya mu tulo ha mikono yeni. Kaha ua sana umo yala linga a ku mu tehule vinkambu. Vunoni mua niangumukile ua vuile ngolo yeni i na mu fumu. Ngeci vaFilisteo va mu kuatele, na ku mu tuva meso linga a ka pue ndungo yavo.

Tangua limo, omo vaFilisteo va kele na cilika ca kama ca ku lemesa njambi yavo Ndangone, va ka hiangele Samusoni linga a ku va zolese. Nkuma mu ntsimbu i na hitimo vinkambu via Samusoni vi na soko naua. Kaha Samusoni ua leka kanike ua kele na ku mu endesa ku mpango ngueni: ‘Nji tuale ku hiehi na vingundzi viemika ino ndzivo’. Kaha Samusoni ua vundila kuli Yehova linga a mu hane ngolo ngeci na kuata vingundzi ngueni: ‘Lelo nji tsa hamo na vaFilisteo’. Ku cilika ku neza vantu va ku pua 3.000, ngeci Samusoni ua pukula vingundzi, kaha ndzivo ya uila vantu vose va vapi va tsila haze vene.