TLAPOUALISTLI 54

Tlakatl tlen okachi chikauak

¿TIKMATI ken itoka tlakatl akin okachi chikauak tlen okatka itech Tlaltikpak? Se juez tlen omotokayotiaya Sansón. Ye Jehová akin okimakak chikaualistli Sansón. Achto nesiskia Sansón, Jehová okilui inantsin: ‘Tikpias se konetl. Ye kimakixtis Israel itech filisteos’.

Filisteos okatkaj tlaltikpaktlakamej tlen amo yolkualmej tlen ochantiayaj itech Canaán. Okinpiayaj miakej soldados, uan okintlajyouiltiayaj israelitas. Se tonal, ijkuak Sansón oyajki kanin ochantiayaj filisteos, se ueyi león okiski uan opejki tsajtsi ixpan. Maski ijkon, Sansón okimikti león san ika imauan. Noijki okinmikti miakej filisteos tlen amo yolkualmej.

Satepan, Sansón opejki kitlasojtla se siuatl tlen omotokayotiaya Dalila. Sejse tlayekankej filisteos okiluijkej Dalila kimakaskiaj 1,100 platajtomin tla kinmiluiskia tleka Sansón okipiaya miak chikaualistli. Dalila okinekiaya nin tomin. Amo melauak okatka iyolikni Sansón, nion ialtepetl toTajtsin Dios. Ik non, opejki kiluia Sansón ma kilui tleka okipiaya miak chikaualistli.

Saiktlami, Dalila okimatki tleka Sansón okipiaya miak chikaualistli. Sansón okilui: ‘Amo keman onechtekilijkej notsonkal. Ijkuak onitlakatki, noTajtsin Dios onechpejpenki pampa niktekichiuilis itech nochi nonemilis ken nazareo. Tla nechtekiliskej notsonkal ayakmo nikpias chikaualistli’.

Ijkuak Dalila okimatki nin, okichi ma kochi Sansón ipan imetsuan. Ijkuakon, okichi ma kalaki se tlakatl uan okitekili itsonkal. Ijkuak Sansón oijsak, ayakmo okipiaya chikaualistli. Axkan okalakej filisteos uan okikitskijkej. Okikixtilijkej ixtololouan, uan okichijkej ma yeto se tlakeuali.

Se tonal, filisteos okipiaya se ueyi iluitl pampa kiueyichiuaskiaj indios Dagón, uan okikixtijkej Sansón itech telpiloyan pampa kipijpinatiskiaj. Axkan itsonkal Sansón oksepa yomoskalti. Sansón okilui konetl tlen okimatilantiaya: ‘Xinechkauili ma nikitski tepamitl tlen kipia nin kali’. Ijkuakon, Sansón okitlatlaujti Jehová ma kimaka chikaualistli, uan okikitski tepamitl. Axkan otsajtsik uan okijto: ‘Xinechkauili ma nimiki iuan filisteos’. Okatkaj kanaj 3,000 filisteos itech iluitl tlen omochijtoka, uan ijkuak Sansón okitopeuak tepamitl, kali ouetski uan okinmikti nochtin ninmej tlaltikpaktlakamej tlen amo yolkualmej.

Jueces 13 a 16.