Historia 54

Se tlakatl melak kojtik

¿TIKMATSTIKA kenon itoka yejon tlakatl akin xakaj ijkon uajnemi melak kojtik ken yejua? Tekiti kentla juez, itoka Sansón. Jehová yejua akin kimaka ikojtilis. Kuakon Jehová kijlia inan Sansón, ijkuak yejua xiuajtlakatiya: ‘Tikpiyas se mokonetsin. Kinmakixtis israelitas itech filisteos’.

Filisteos akin chantij Canaán melak xkuakualtin katkaj. Kinpiyaj miyek soldados, niman kintlajyouiltiaj israelitas. Se tonajli, ijkuak Sansón yauj kampa chantij filisteos, se león ouajkis, uajnanalkatiuj. Sansón kimiktia león san ika imauan. Noijki kinmiktia melak miyekej filisteos.

Sakin, Sansón kuelita se siuatl itoka Dalila. Makuiltin tlakamej akin kinyekanaj filisteos kijliaj Dalila ika kimakaskej cinco mil quinientos platajtomin tla kimijlia tleka Sansón melak kojtik. Dalila kineki yejon tomin. Xyemelak nouika iuan Sansón, nion iuan israelitas. Kuakon yejua ok kitlajtoltia Sansón tleka melak kojtik.

Dalila kichiua ika Sansón makijli tleka melak kojtik. ‘Xkeman nechtekiliaj notson’, kijtoua Sansón. ‘Ijkuak onitlakat, toTajtsin onechtlapejpeni manikchiua se tekitl kentla nazareo. Tla nechtekiliaj notson nikpolos nokojtilis.’

Ijkuak Dalila kikaki yejuin, kichiua Sansón makochi ipan imetskojyouan. Nimantsin kichiua ika se tlakatl makalaki niman makitekili itson. Ijkuak Sansón tlachia, yokipolo ikojtilis. Filisteos kalakij niman kasij. Kikixtiliaj ixtololouan, niman kitekitiltiaj kentla se tlakeuajli.

Se tonajli, filisteos kipiyaj se ueyi iluitl kampa kiueyichiuaj intajtsin Dagón, kuakon kikixtiaj Sansón kampa tsaujtika niman ijkon kipijpinaujtiskej. Ipan yejon tonajli, itson Sansón youeueyakiyaka. Sansón kijlia telpokatsin akin kuikaya ipan ima: ‘Xnechkauili manikinkitski yejon pilares tlen kimamajtika yejuin kajli’. Kuakon Sansón kichiuilia se teoyotl Jehová niman kijlia makimaka kojtilistli. Aman tsajtsi: ‘Xnechkauili manimiki imiuan filisteos’. Nemij yeyi mil filisteos akin kichiuaj yejuin iluitl, niman ijkuak Sansón melak chikauak kinmapeua pilares, nochi kajli uetsi niman kinmiktia nochimej tlaltikpakchanejkej xkuakualtin.

Jueces, tlaxeloltin uejueyimej 13 ontlami ipan 16.